Sipas rezultatit vetëm 59% e njerëzve në Evropën Perëndimore dhe 50% në atë lindore mendojnë se vaksinat janë të sigurta, krahasuar me 79% në mbarë botën.

Në të gjithë globin, 84% e njerëzve e pranojnë se vaksinat janë efektive dhe 92% thonë se fëmija i tyre ka bërë të paktën një vaksinë. Por, përkundër sistemeve të mira shëndetësore dhe arsimore, në pjesë e Evropës ka një besim të ulët ndaj vaksinave. Franca ka nivelet më të larta të mosbesimit, me 33%.

Madje në disa prej këtyre vendeve të Evropës ka pasur shpërthime të mëdha të fruthit, të përhapura më pas në të gjithë kontinentin, për shkak të hezitimit që kanë njerëzit ndaj vaksinave.

Sipas drejorit të projektit që studion besimin e njerëzve tek vaksinat, Dr. Heidi Larson,  mediat sociale i përforcojnë këto shqetësime të njerëzve lidhur me vaksinat. Edhe pse besimi ndaj vaksinave në Britaninë e Madhe ishte më i lartë se në disa pjesë të tjera të Evropës, Mbretëria e Bashkuar është e prekshme ndaj sëmundjeve për shkak të pozicionit gjeografik që ka.

Sondazhi i parë Wellcome Global Monitor, i cili ka shqyrtuar qëndrimet e 140,000 njerëzve në mbarë botën, tregon lidhje të qarta mes besimit të njerëzve tek mjekët, infermierët dhe shkencëtarët dhe besimin e tyre ndaj vaksinave. Ky sondazh gjithashtu tregon se mosbesimi në institucionet qeveritare shkon krah për krah me dyshimet rreth sigurisë së vaksinave.

Ky studim i parë global tregon qartë se besimet e njerëzve rreth shkencës janë të ndikuara thellësisht nga kultura, konteksti dhe formimi i tyre, thanë studiuesit.

Nëse ne duam që njerëzit të përfitojnë nga shkenca, duhet të kujdesemi për këto lidhje, thanë ata.

Ka gjithnjë e më shumë popuj dhe vende të tëra në të gjithë botën ku besimi tek vaksinat po bie dhe numri i bërjes së tyre po bie. Kjo përbën një rrezik të madh për shëndetin publik.

Sipas këtyre studiuesve prindërit e rinj duhet të marrin përgjigje në mënyrë të menjëhershme nga stafi mjekësor dhe jo të kërkojnë ndihmë nga mediat sociale për këtë temë pasi mund të ndikohen për keq.

Kjo pasi ka një hendek midis ritmit dhe disponueshmërisë së informacionit nga burimet mjekësore. Njerëzit duhet të ndihen të dëgjuar. Nëse ata nuk dëgjohen, ata e humbasin besimin.

Unicef tha në mars se rastet e fruthit në mbarë botën po rriteshin në “nivele alarmante të larta”. Sëmundja është mjaft infektive dhe në vendet në zhvillim vret 1 në 100 fëmijë që e marrin.

Global Monitor gjeti mendime të dyzuara rreth shkencës në mbarë botën. Gjysma e popullsisë së botës thanë se ata dinin pak për shkencën dhe 20% thanë se ndiheshin të përjashtuar nga përfitimet e saj.

Lexo edhe: Vaksina që duhet bërë në javët e para të jetës