Kanë kaluar katër vjet nga lindja ime e parë dhe dy nga e dyta, në këtë moment mund të them se kam mësuar shumë gjëra që më parë nuk i dija dhe mendoj se eksperienca është ajo që na mëson më tepër. Jo më kot fëmija i dytë na duket më i menaxhueshëm (tashmë dimë si ta lajmë, cila muind të jetë arsyeja që po qan, si ta mbajë etj).

Personalisht mësova shumë gjëra nga shtatzania deri sot, dhe mund të them se kur kthej kokën pas mund të kisha ndryshuar shumë gjëra, nuk e mohoj që mund të kisha pasur një ushqyerje më të mirë në shtatzani, mund të kisha pasur më pak frikë nga lindja, mund të kisha qënë një qënie më e përsosur në përgjithësi dhe nënë më e mirë për të porsalindurin, por jam këtu, një nënë shumë e dashur dhe kam dy fëmijë që mendoj se i kam edukuar në mënyrën e duhur.

Personalisht shtatzania dhe mëmësia më mësuan…

• Bukuria e jashtme është një tipar që e gëzojmë për një kohë të caktuar, në një moment mund të zgjohemi në mëngjes dhe të shohim para pasqyrës një njeri tjetër, një grua me një pamje që nuk i afrohet aspak të bukurës. Këtë e mësova pasi u zgjova një mëngjes në muajin e 6 të shtatzanisë me një fytyrë të deformuar si pasojë e një paralize faciale. Tashmë edhe pse kam rikuperuar disi, asnjëherë nuk mund të kthehem në pamjen time të mëparshme.
• Salla e operacionit mund të ngjajë si vendi prej të cilit nuk do të mund të dalësh më. Këtë ndjesi ma krijoi ftohtësia e atij vendi si edhe dritat e cuditshme që ndodheshin atje. Në një moment mu duk sikur u futa në një botë tjetër prej së cilës vështirë se do të dilja më.
• Të gjithë do të jenë atje për të pritur lindjen, por ti do të dish vetëm nëse bashkëshorti dhe nëna jote ndodhen atje. Prezenca e tyre është ajo që të jep forcë.
• Nata e parë pas lindjes mund të jetë më e çuditshmja nga të gjitha. Tashmë nuk je më shtatzanë dhe jeta jote ka marrë një kthesë shumë të madhe. Mendoj se ajo është nata që të bën të ndihesh më cuditshëm, pasi të dytën, të tretën e me radhë je mësuar disi me idenë.
• Të duhet tepër ndihmë sado e fortë të jesh. Nëna jote mund të bëhet figura më e fortë për ty në ato momente. Ajo e kupton më mirë se kushdo për çfarë ke nevojë dhe madje arrin të të ndihmojë më mirë se të gjithë!
• Gjidhënia është edhe më e vështirë se lindja! Shumë komplekse dhe jo të gjithë dinë të të japin ndihmën e duhur.
• Kthimi në shtëpi do të jetë po aq i cuditshëm sa nata e parë në spital. Po tani çfarë do të ndodhë? Si duhet të organizohet jeta? Këto janë dyshimet e para që lindin në kokën tuaj.
• Depresioni post-partum është armiku më i madh i nënës së re. Më besoni, jo të gjithë e kuptojnë si ndihesh, të tregojnë që më parë “këto gjëra” nuk kanë ekzistuar, se gratë vite më parë nuk qanin pa arsye etj. Ju duhet të tregoheni vigjilente dhe të mos e lini veten pas dore.
• Viti i parë, i dytë, i tretë e me radhë… janë të gjithë njësoj. Fëmija edhe pse është disi më i rritur është fëmijë dhë ka nevojë për kujdes. Të tjera probleme shfaqen dhe ka gjithmonë sfida të reja.

Dhe mos harroj t’ju them se mëmësia më mësoi se jo të gjithë dinë të japin këshillat e duhura në lidhje me edukimin e fëmijës. Shumë prej tyre mund të thonë “ky fëmijë do të bëhet i shkathët” apo “ky fëmijë do të bëhet i egër”, shprehje që mendoj se nuk kanë kuptim. Fëmija do të bëhet ai që ti ke menduar të bëhet. Pra ai do të marrë atë që unë i jap, do të bëjë ashtu si unë bëj!

Lexo edhe: Sfidat e prinderimit, nga sociologia Marsida Simo

Ato gjera qe nje nene te ardhshme nuk ja thone

Sorry, there are no polls available at the moment.

')}