Një ngjarje e rëndë ka ndodhur dje në Berat, ku dy binjakë 5-muajsh, ndërruan jetë. Ata u dërguan në spital të pajetë dhe dyshimet e para ishin se fëmijët mund të ishin helmuar nga qumështi me kuti.
Por sipas burimeve nga spitali i Beratit, nga analizat e kryera nuk ka rezultuar të ketë pasur shenja helmimi në trupin e tyre. Mjekët dyshojnë te një tjetër pistë, se binjakët mund të jenë asfiksuar nga soba me dru në shtëpi.
Në lidhje me ngjarjen e rëndë, ka reaguar drejtoresha e Spitalit Rajonal të Beratit, Edlira Shkëmbi. Kjo e fundit tregon sesi ndodhi ngjarja dhe veprimet që janë kryer.
“Ditën e sotme rreth orës 10.00 në shërbimin e Pediatrisë u paraqitën dy fëmijë binjakë (djem) të moshës 4 deri 5 muaj banues në lagjen Uznovë, shoqëruar nga nëna e tyre. Mjeku pediatër referon se fëmijët ishin të dy pa shenja vitale në momentin që kanë ardhur në spital dhe mund të kishin 1 orë që mund të kishin vdekur. Në këto kushte, mjeku thjesht ka konfirmuar vdekjen pa patur mundësi të jepte ndihmë mjekësore. Fëmijët nuk janë paraqitur më parë në spital për vizitë dhe nuk kemi informacion mbi historikun apo problematika për shëndetin e tyre. Fëmijët u transferuan në Morgun e Spitalit. Menjëherë u ftua mjekësia ligjore dhe policia për të gjetur shkakun e vdekjes”.
Nëna i kishte lënë për pak kohë binjakët me një fqinjë, pasi ishte larguar për në dyqan. Kur është kthyer, ajo i ka gjetur pa jetë vogëlushët e saj.
Ndërkaq, ende vijojnë hetimet për të zbuluar shkaqet e vdekjes së vogëlushëve.
Për të lënë një koment ju duhet të jeni regjistruar Identifikohu