Mikroplastika – ose fragmente plastike më të vogla se 5 milimetra – gjenden kudo, që nga uji në shishe deri te ushqimi. Tashmë dihet se ato janë shumë të përhapura në mjedisin përreth nesh dhe për këtë arsye, nuk është për t’u habitur që disa studime kanë gjetur tashmë praninë e këtyre grimcave në feçet e njerëzve dhe kafshëve shtëpiake.

Megjithatë, tani, në një studim të ri pilot, studiuesit e udhëhequr nga Kurunthachalam Kannan i Shkollës së Mjekësisë të Universitetit të Nju Jorkut (Shtetet e Bashkuara) kanë zbuluar se edhe më shumë mikroplastikë është e pranishme në fecen e të porsalindurve (deri në 10 herë më shumë!) sesa ato të gjetura tek të rriturit. Studimi u botua në revistën American Chemical Society, ACS Environmental Science & Technology Letters.

Efektet shëndetësore ende pak të njohura

Tani për tani, dihet pak për shtrirjen e ekspozimit të njeriut ndaj mikroplastikës ose efektet e tyre në shëndet. Edhe pse në të kaluarën besohej se mikroplastika kalonte në mënyrë të padëmshme përmes traktit gastrointestinal për t’u eliminuar, studimet e fundit sugjerojnë se pjesët më të vogla mund të kalojnë membranat qelizore dhe të hyjnë në qarkullim. Disa kërkime të kryera në laborator mbi qelizat dhe kafshët kanë treguar gjithashtu se ekspozimi ndaj mikroplastikës mund të shkaktojë vdekjen e qelizave, inflamacionin dhe çrregullimet metabolike, si diabeti, jo çuditërisht në rritje tek fëmijët.

PET dhe PC nën vëzhgim

Studiuesit përdorën spektrometrinë e masës për të përcaktuar përqendrimet mikroplastike të PET (polietileni tereftalat, materiali i përdorur për shishet) dhe PC (polikarbonat, i përdorur gjerësisht në optikë, ndërtim, elektronikë) në gjashtë mostra të jashtëqitjeve të foshnjave dhe në 10 mostra të jashtëqitjeve të të rriturve, si dhe tre mostra mekoniumi (jashtëqitja e parë e një të porsalinduri).

Të dhënat e mbledhura treguan se të gjitha mostrat e fekaleve përmbanin të paktën një lloj mikroplastike dhe, megjithëse nivelet mesatare të mikroplastikës PC ishin të ngjashme midis të rriturve dhe foshnjave, jashtëqitja e foshnjave përmbante përqendrime mesatare të PET më shumë se 10 herë më të larta se ato të të rriturve.

Fëmijët – shpjegojnë studiuesit – mund të ekspozohen ndaj niveleve më të larta të mikroplastikës përmes përdorimit të produkteve të tilla si letrat e çamçakëzit dhe lodrat. Megjithatë – përfundojnë ata – për të konfirmuar rezultatet e marra do të jetë e nevojshme të kryhen studime më të mëdha.

Studime të reja gjithashtu do të duhet të kryhen në afat të gjatë për të kuptuar nëse dhe si mikroplastika mund të ketë efekte të mundshme negative për shëndetin.