Çdokujt prej nesh mund t’i ketë rënë rasti të shohë fëmijë lypsarë dhe ndoshta edhe të ketë shkëmbyer një bisedë me ta. Në vendin ku jetojmë është shumë e zakontë që në trafik, në rrugë, në spitale, në kafene, madje edhe në lokale nate të ndeshesh me këta fëmijë të cilët herë me mirësjellje, herë me sharje e kërcënime të kërkojnë disa të holla.
Me një situatë të tillë u ndesha në një kafene, kur një vogëlushe rreth 8-vjeçare me një bebe në krahë m’u afrua duke zgjatur dorën për para. Mendimi dhe shqetësimi im i parë ishte foshnja disa muajsh dhe e pyeta menjëherë çfarë e kishte dhe nëse kishte mbushur 1 vjeçe. Vogëlushja më tha se e kishte motër, por nuk e dinte moshën e saj. U çudita! Po ti sa vjeçe je, e pyeta. Vajza ngriti supet, nuk e dinte moshën e saj. Për të hamendësuar moshën, doja ta pyesja në çfarë klase shkonte, por shpejt u kujtova që situata mund të ishte edhe më keq nga ç’mendoja. Atëherë i thashe: A shkon në shkollë? Jo më tha.
Por mimika e saj dukej se shprehte pakënaqësi që po i humbisja kohën duke bërë aq shumë pyetje dhe ende nuk i kisha dhënë asnjë të hollë. Prandaj në atë moment tha: O vajza të lutem se qenke edhe si K… ( emrin e një këngëtareje, të njohur edhe për ekstravagancën e saj) më jep ndonjë lekë.
Ku e njeh K.. e pyeta? E kam parë tha në internet. Po me çfarë pajisje vazhdova unë më tej, në kompjuter, telefon? Në telefon u përgjigj, kam parë video të saj. Pra ti ke telefon, sërish iu drejtova. Jo, jo- tha- nuk kam.
Kështu ajo vajzë më futi shumë në mendime. Faktet e saj kontradtiktore: nuk dinte sa vjeçe ishte ajo dhe e motra, nuk shkonte në shkollë, por njihte këtë kengëtare dhe kishte akses në një celular që nuk ishte i saji.
Para çfarë gjërash të tjera mund të jetë i ekspozuar ky fëmijë, pa marrë parasysh gjithë rrezikun që i kanoset vetëm nga fakti që rri në rrugë me një bebe për të kërkuar para.
A ka institucione që merren me këta fëmijë dhe sa funskionale janë?!
Lexo edhe: Mes luksit dhe skamjes fëmija që mbante dorën shtrirë për disa monedha
Për të lënë një koment ju duhet të jeni regjistruar Identifikohu