Sipas “The daily mail”, prindërit duhet të bëjnë kujdes ndërsa kanë fëmijën në makinë, pasi në një moment gjithë jeta mund të ndryshojë, një gabim i vogël mund t’i marrë jetën një fëmije. Diçka e tillë ka ndodhur në Irlandë me një vajzë të vogël 7 muajshe e cila është lënë në makinë për orë të tëra. Vajza është gjetur pa shenja jete nga policia e zonës në fshatin “Dundrum” në “Tipperary” e cila është dërguar menjëherë në spital me helikopter. Atë ditë temperatura ishte rreth 25 gradë celcius. Mendohet se babai e harroi për një moment që kishte edhe vajzën në makinë ndërsa shkoi për të përfunduar disa punë në zyrën e tij.

Si ndodhi kjo tragjedi?

Babai i fëmijës e kishte lënë atë në makinë dhe kishte shkuar të kryente punët e tij në kompani dhe kjo gjendje nga policia është konsideruar si mjaft delikate dhe një tragjedi personale. Duke qënë se fëmija është “harruar”  në makinë në një ditë të nxehtë, kjo duhet të shërbejë si një mësim për të gjithë prindërit në mënyrë që të kenë kujdes në momentin që janë me fëmijën e tyre në makinë. Ajo duhet të jetë e ajrosur mirë dhe në asnjë moment fëmija nuk duhet të qëndrojë vetëm, dhe për më tepër me xhama të mbyllur. Kjo ngjarje ka qënë një shok për të gjithë zonën duke qënë se familja respektohej dhe njihej nga të gjithë, kështu shprehet edhe punonjësi i policisë Martin Browne.

Kini parasysh se në këto ditë të nxehta fëmija ka nevojë të hidratohet sa më shpesh duke pirë ujë si edhe të mbahet sa më larg rrezeve të forta të diellit. Gjithashtu edhe veshja e fëmijës duhet të jetë sa më e lehtë dhe kapelja duhet të mos mungojë kurrë. E ritheksojmë edhe në këtë artikull, bëni kujdes me karrocat e bebeve. Ato nuk duhet kurrësesi të mbulohen me çarçafë apo garza të holla. Kjo mund të bëjë që fëmija të asfiksohet.