Blogerja e njohur dhe gjithmonë e buzëqeshur Estela Ujka ka folur në një shfaqje të organizuar nga ORAT, një rrjet për fuqizmin e grave dhe vajzave në Shqipëri, të mbajtur në arTurbina.
Ndër të tjera Estela ka rrëfyer edhe disa nga peripecitë e jetës së saj, duke u nisur që nga fëmijëria dhe më pas karriera dhe martesa.
Blogerja ka treguar se është rritur në një familje ku nëna kish qenë e persekutuar, ndërsa i ati një njeri i shkolluar me dy fakultete. “Babai ishte autoritar, më dominant dhe duhet të kishte gjithnjë të drejtë,” tha ajo. “Në këtë ambient u rritëm, me një mama shumë të dashur, të përkushtuar dhe shtëpiake dhe me një baba më në pozitë që duhet të kishte gjithnjë të drejtë kur fliste.”
Në vijim, ajo u ndal edhe te historia e dashurisë me bashkëshortin, me të cilin ka tre vajza.
“Ndodhi që u dashurova, me njeriun i cili sot është bashkëshorti im, atëherë ishte i gabuar për të gjithë shoqërinë shqiptare. Ishte i martuar,” tha ajo referuar faktit se bashkëshorti kishte pasur një martesë të përfunduar, përpara se të lidhej me Ujkën.
“Për ta ishte fundi i botës. Sigurisht që i dhanë zgjidhjen më të gabuar të mundshme. Gjetën një burrë tjetër. Pati edhe momente dhune; unë i kam falur dhe i dua njësoj se e di që thellë-thellë për të mirën time janë munduar, pavarësisht se forma ishte e gabuar. Duhet të më kishin dëgjuar, siç dëgjoj unë vajzat e mia. Dua t’u them të gjithë grave dhe vajzave shqiptare që të luftojnë për atë që duan sepse në fund jeta është e tyre dhe vetëm ato kanë të drejtë për të. Sot, zgjedhja ime, në dukje e gabuar, është babai i tre vajzave të mia, ai me të cilin kam ndërtuar jetën. E dua dhe vazhdon të më dojë njësoj. Nuk është ai monstra që mendonin prindërit e mi, vetëm nëse do më kishin dëgjuar sadopak. Sigurisht që edhe me bashkëshortin dhe me babain e vajzave të mia çdo ditë jemi në beteja të vogla për të vendosur ato balancat edhe rolin e secilit në familje. Edhe bashkëshorti im vjen nga një kulturë e familjes shqiptare ku edhe ai do që të ketë të drejtë dhe të vendosë, por duke punuar përditë me fëmijët, me veten dhe sot kur e shoh veten ne pasqyre jam shume krenare, ” përfundoi blogerja, e cila këshilloi të pranishmet në sallë që të mos kenë frikë të jenë vetvetja dhe të shkojnë përjet barrierave që i pengojnë.
Për të lënë një koment ju duhet të jeni regjistruar Identifikohu