Qumështi i gjirit ka një sërë të mirash për fëmijën dhe kryesisht njihet sepse parandalon dhjamosjen, nxit rritjen në zorrë të mikrobeve jo të dëmshëm për organizmin, ndihmon lidhjen nënë-fëmijë, është i gatshëm sa herë nevojitet për të kënaqur nevojat ushqimore, realizon një zhvillim të mirë të fëmijës, mbron nga sëmundjet alergjike, mbron nga infeksionet edhe pas ndërprerjes së gjirit…
Si e mbron qumështi i gjirit fëmijën nga infeksionet?
Qumështi i nënës është i pajisur me një sistem mbrojtës, në sajë të:
- Cilësive kundër inflamacionit. Normalisht, sa herë që kemi një infeksion, organizmi i njeriut i përgjigjet me një inflamacion, i cili nëse është i theksuar, mund të bëhet edhe i rrezikshëm. Qumështi i nënës, falë disa lëndëve që përmban, e zbut atë.
- Ai ka cilësi kundër infeksionit, të cilat sigurohen nga prania në qumështin e nënës të rruazave të bardha, trupëzave mbrojtës (IgA sekretore) lizosimat dhe laktoferrina. Në këtë mënyrë qumështi i nënës është në gjendje të mbrojë jo vetëm prej “armiqve” të jashtëm, por edhe atyre të brendshëm, të cilët nuk janë të paktë. Duhet të kujtojmë se qumështi i nënës nuk është steril, por agresiviteti i mikrobeve të përmbajtura në të, është “nën kontroll të rreptë”.
- Cilësive të rritjes së imunitetit. Disa faktorë të pranishëm në qumështin e nënës (laktoferrina, nukleotidet, citokinat) ushtrojnë një veprim nxitës mbi sistemin imunitar, që i lejon fëmijës të mbrohet nga infeksione të ndryshme, pasi është ndërprerë ushqyerja me gji. Mund të duket shumë e çuditshme çfarë po themi, por kjo është vërtetuar tashmë nga studime shkencore shumë serioze. Për shembull qumështi i nënës e mbron fëmijën nga infeksionet e veshit përreth 3 vjet pas ndërprerjes së gjirit. Kjo është një ndihmë e çmuar po të llogarisim se sa i shpeshtë është ky infeksion.
Një studim i viteve 1998 i kryer nga Universiteti Wilson, ka treguar se të vegjlit mund të mbrohen nga infeksionet e mushkërive dhe të rrugëve të frymëmarrjes përreth 7 vjet, nëse janë ushqyer për 15 javë rresht pa ndërprerje vetëm me gji. Por ky fakt i fundit është ende më i bukur! Mund të të mbrojë për 10 vjet ndaj infeksioneve të shkaktuara prej Hemophilus influenzae (në rastet më të rënda shkakton meningjit). Cilësitë imunomoduluese të qumështit të nënës janë përgjegjëse për shpeshtësinë më të pakët në moshë të rritur të sëmundjeve të rënda imunitare, inflamatore dhe tumorale.
Lexo edhe:
Si duhet te behet ushqyerja me qumesht shtese?
Si ta bejme gjidhenien te funksionoje?
Cila eshte lidhja qe ekziston mes peshes dhe ushqyerjes me gji?
')}
Për të lënë një koment ju duhet të jeni regjistruar Identifikohu