Të gjithë duan të përgatisin diçka sa të shijshme, aq edhe të shpejtë dhe praktike, e sidomos ne nënat qe kemi plot gjëra për të bërë, e si rrjedhojë ëmbëlsira mbetet e fundit në listë.

Për t’ju dhënë një ide, sot do të ndajmë me ju një recetë praktike, pa shumë shpenzim dhe shumë të shijshme!

 

Mozaik!

 

Ideale për nënat që e kanë kohën e limituar! Para se të flini, përgatiteni këtë ëmbëlsirë për 10 minuta dhe lëreni në frigorifer. Në mëngjes ëmbëlsirën do ta keni gati!

 

Përbërësit për këtë ëmbëlsirë janë këto:

 

– 100 gr. gjalpë

– 1 gotë uji me qumësht (200ml)

– 3 lugë kakao

– 4 lugë sheqer pluhur ose 3 lugë sheqer normal

– 2 pako biskota Petibor

 

* Sipas dëshirës mund t’i shtoni edhe arra, lajthi etj.

 

Përgatitja:

 

– Shkrijmë gjalpin

– Në një enë hedhim sheqerin, kakaon, qumështin dhe gjalpin e shkrirë

– Pasi e përziejmë mirë përbërjen, mbi të i shtojmë edhe biskotat duke i copëtuar jo shumë imët.

* Sipas dëshirës shtohen edhe arrat.

– Pas një përzierjeje të fundit me delikatesë, pa e prishur tërësisht formën e biskotës, ëmbëlsira është gati për frigorifer.

 

Se fundmi, në një enë që ne do ta zgjedhim si kallëp për mozaikun, vendosim stretch foli, pastaj hedhim përbërjen dhe pasi e kemi mbështjellë mirë me stretch foli, e vendosim në frigorifer te ngrirja.

 

* Idealja është qëndrimi në ngrirje 4 orë, por nëse do ta lini gjatë natës në frigorifer, nuk është e domosdoshme ta vendosni në ngrirje.

 

Kjo ëmbëlsirë serviret e ftohtë. Ju bëftë mirë!