Keni dëgjuar ndonjëherë më parë në lidhje me “lotus birth”? Kjo duket se ka filluar të shndërrohet në një “modë” në shumë vende të botës, dhe konsiston në mosprerjen e kordonit ombelikal pas lindjes. Por mjekët shprehen se edhe pse nënat e kërkojnë shumë dhe shumë struktura e praktikojnë, nuk është e sigurt! Sipas shoqërisë italiane të neonatologjisë, kjo nuk këshillohet për shumë arsye, midis të cilave për shëndetin e nënës, fëmijës, dhe jo vetëm.
Rreziqet e “lotus birth”
Kjo lindje quhet “lotus birth” në nder të infermieres që në vitin 1974 e kërkoi ta praktikonte për herë të parë tek fëmija i saj. Kjo ndodhi në Kaliforni. Gjatë kësaj praktike kordoni ombelikal nuk pritet dhe plaçenta qëndron e ngjitur me fëmijën edhe pas lindjes. Disa studime e kanë vlerësuar këtë si një metodë që sjell përfitime të ndryshme për fëmijën, por mjekësia e sotme e konsideron atë si një faktor shumë të rrezikshëm për përhapjen e infeksionit. Përfitimet mendohej se kishin lidhje me sasinë e gjakut që fëmija vazhdonte të merrte nëpërmjet kordonit ombelikal, gjak që parandalonte formimin e anemisë, por në të vërtetë mjekët e ditëve të sotme e hedhin poshtë këtë, duke qënë se kordoni vazhdon të pulsojë pas daljes nga trupi i nënës vetëm për pak minuta. Nëse do të praktikohet “lotus birth”, do të pritet që kordoni të shkëputet vetë nga trupi i fëmijës së bashku me placentën, pas rreth 4 ditëve.
Sipas shoqërisë italiane të neonatologjisë, kjo është një praktikë që qëndron jashtë të gjitha normave të higjenës sanitare.