Myku i gojës është një infeksion kërpudhor i shkaktuar nga një tip i veçantë kërpudhe (Candida albicans) e cila prek të porsalindurin, sidomos në periudhën e gjidhënies.

Candida albicans është i njëjti shkaktar që krijon edhe skuqjet e mëdha në zonën e bebelinës si edhe candidën vaginale. Myku oral zakonish shfaqet gjatë 6 muajve të parë të jetës, dhe zakonisht merret gjatë kalimit të fëmijës në kanalin e lindjes. Fillimisht shfaqet në gojë, në gjuhë, në xhinxhivat, në brendësi të faqeve dhe në disa raste edhe në buzët e fëmijës. Myku mund të shfaqet tek fëmija në formën e pikave të bardha, të cilat nuk janë të njëjta me mbetjet e qumështit. Nëse përpiqeni t’i hiqni ato mund të shkaktojnë inflamacion dhe në disa raste edhe dalje gjaku.

Çfarë duhet të bëjmë?

Myku në përgjithësi nuk është i rrezikshëm dhe mund të zhduket brenda disa javësh. Për të evituar ndonjë problem të mundshëm, sidomos infeksion të cilat mund ta vështirësojnë gjidhënien, duhet të ndërhyni në kohën e duhur.

Ja si duhet të veproni:

• Pas çdo pirje, qoftë në gji apo në biberon, duhet të pastroni gojën e fëmijës me anën e një garze sterile të zhytur në solucion fiziologjik. Një alternativë shumë e mirë do të ishte edhe përdorimi i ujit me sodë, e cila duhet të përgatitet duke hedhur një lugë sodë në një gotë me ujë të zier.
• Në rast se problemi nuk po zgjidhet mund të merrni në farmaci anti-mykotikë, të cilët mund të jenë në formë lëngu ose xheli. Kjo përbërje duhet përdorur disa herë gjatë ditës derisa të zhduken plotësisht simptomat. Gjithsesi duhet të merrni fillimisht rekomandimin e mjekut pediatër.
• Në rast se fëmija ka temperaturë të lartë, të vjella, kollë apo diarre duhet të shkoni menjëherë tek mjeku i fëmijës, i cili do të bëjë një diagnostikim të gjendjes së fëmijës për të përshkruar më pas terapinë e nevojshme.

Rëndësia e higjenës

Ashtu si edhe shumë infeksione të tjera që mund të prekin të porsalindurin, edhe myku merret nëpërmjet kalimit të fëmijës në kanalin e lindjes dhe simptomat e tij mund të lehtësohen duke përmirësuar kushtet higjenike të fëmijës. higjena duhet të jetë e një niveli shumë të lartë, dhe këtu flasim qoftë për trupin e fëmijës edhe për objektet e tij të cilat duhet të sterilizohen.
• Para çdo vakti që fëmija do të pijë në gji apo biberon, duhet të lani mirë duart pasi shpesh mund të bëhen mjet transporti për bakteriet.
• Gjatë gjidhënies duhet të mbani një higjene shumë të mirë të gjirit. Thithat duhet të pastrohen gjithmonë me shumë kujdes sa herë që fëmija do të pijë.
• Nëse fëmija ushqehet me biberon, pas çdo vakti që ai ka pirë nuk duhet të mjftoheni vetëm me larjen e shishes, por duhet të sterilizoni atë bashkë me kokat e silikonit/llastikut. E njëjta gjë vlen edhe për çuçon. Në këtë rast këto objekte duhet të ndërrohen shumë shpesh.

Lexoni edhe: Ja cfare e shkakton mykun tek femijet?