Historia familjes së tyre është sa e dhimbshme aq edhe emocionuese dhe me mesazhe të forta për dashurinë e lidhjen mes prindërve dhe fëmijëve.
Ndërsa Lesa Brackbill solli në jetë dy binjakët e saj me prerje cezariane, mjekët ia dhanë fëmijët të atit, për të pasur kontaktin aq të vlefshëm me lëkurë. Meqë nëna ishte në gjendje narkoze nga operacioni, ishte babai që u zhvesh dhe mori fëmijët për një orë në kraharorin e tij, që ata të ndjenin ngrohtësinë, dashurinë dhe aromën prindërore.
Ky moment u përjetësua me anë të disa fotove, të cilat u shpërndanë në rrjetet sociale. Ajo që i ka bërë përshtypje nënës së re është habia që kanë shfaqur komentuesit kur kanë parë babain që mbante në kraharor fëmijët pas lindjes.
“Ky do të jetë një kujtim shumë i çmuar për ta. Bashkëshorti im ishte kaq i apasionuar për diçka të tillë. Ai ka bërë të njëjtën gjë me vajzën tonë Viktoria, pasi unë linda me operacion”, – tregon nëna.
Hulumtimet tregojnë se kontakti me lëkurë mes prindërve dhe të porsalindurit mund të ketë efekte të mahnitshme pozitive. Fëmijët janë të prirur të kenë rezultate më të larta në shkollë, sjellje më të mirë dhe ndikimi i kësaj praktike është parë edhe dekada më pas.
Brackbill thotë se është shumë krenare për burrin e saj që i dha secilit nga fëmijëve atë për të cilën kishin nevojë, që nëna nuk ua jepte dot.
Historia e vajzës
Vajza e tyre e parë Viktoria lindi gjithashtu me operacion edhe pse ishte planifikuar që do të bënin lindje natyrale. Për shkak të komplikimeve që pati gjatë procesit të lindjes, mjekët vendosën të bënin ndërhyrje dhe sërish ishte babai ai që mori fëmijën në kraharor sapo ajo erdhi në këtë botë.
Por për fat të keq ajo u largua shumë shpejt, 20 muaj pasi lindi, për shkak të një sëmundjeje që prek sistemin nervor e quajtur sëmundja Krabbe. Brackbill e përshkruan udhëtimin e familjes së saj, si një udhëtim që ka kaluar përmes thyerjes së zemrave, shpresës dhe triumfit.
“Ne duam që njerëzit të jenë të vetëdijshëm për këtë sëmundje, sepse ne nuk e dinim se ekzistonte. Në rastin e vajzës, ajo u zbulua pas 6 muajsh. Nëse zbulohet më herët ka mundësi kurimi. Përvoja jonë me Viktorian vetëm sa na shton gëzimin për binjakët”, – thotë nëna.
Ajo shpreson që imazhet e djemve të saj duke bërë kontaktin lëkurë me lëkurë me babain përforcojnë mesazhin që mjekët kanë thënë për vite: ky kontakt nuk është vetëm për nënat.
Lexo edhe: Kontakti lekure me lekure, efekte pozitive edhe te plaga e nenes
Sorry, there are no polls available at the moment.')}
Për të lënë një koment ju duhet të jeni regjistruar Identifikohu