Gjithnjë e më shumë njerëz po marrin sot suplemente të vitaminës D, krahasuar me 20 vite më parë por kjo mund të mos jetë gjë e mirë.
Vitamina D njihet si vitamina e diellit dhe që njerëzit ta prodhojnë atë, lëkura e tyre duhet të jetë e ekspozuar ndaj dritës së diellit. Njerëzit gjithashtu mund të marrin vitaminën D nga ushqimet si qumështi, lëngu i portokallit dhe drithërat, nga disa lloj peshqish apo edhe suplementet.
Shkencëtarët e kanë deklaruar se vitamina D është e rëndësishme për shëndetin e kockave dhe të trurit, dhe në vitet e fundit, ata kanë thënë se kjo vitaminë mund të përdoret si një trajtim i mrekullueshëm për çdo gjë, nga dhimbjet e kokës tek sëmundjet e zemrës e deri tek gripi. Nga ana tjetër mungesa e vitaminës D lidhet me probleme të shumta shëndetësore, dhe nivelet e ulëta janë të zakonshme tek njerëzit, veçanërisht gjatë dimrit.
Për këto arsye, kompanitë e këtyre suplementeve kanë promovuar përfitimet e mundshme nga një pilulë e përditshme e vitaminës D dhe nuk është e pazakontë që mjekët t’i rekomandojnë ato për pacientë të caktuar.
Por studimet për vitaminën D nuk kanë qenë jashtëzakonisht pozitive. Një raport i Institutit të Mjekësisë 2011 arriti në përfundimin se një dozë e lartë në ditë mund të shkaktojë që të rriten nivelet e kalciumit në gjak, gjë që mund të çojë në forcim të enëve të gjakut ose indeve të buta. Studime të tjera kanë gjetur pak ose aspak përfitim, sa i përket kancerit apo rrezikut të sëmundjeve të zemrës, nga vitamina D.
Hulumtuesit në Universitetin e Minnesota School of Public Health dëshironin të shihnin nëse ka pasur një rritje të njerëzve që marrin doza të larta të vitaminës D.
Kështu u analizuan të dhënat nga afërsisht 40,000 të rritur që iu përgjigjën pyetësorëve shëndetësorë midis viteve 1999 dhe 2014. Pjesëmarrësit u pyetën për suplementet e tyre të përditshme gjatë 30 ditëve të fundit dhe iu kërkua të sillnin shishet e tyre të pilulave për të siguruar saktësinë në përgjigjet e tyre.
Dhe në vitin e parë të studimit, 1999-2000, vetëm 0.3% e pjesëmarrësve raportuan se kishin marrë vitaminë D në doza dukshëm më të larta se ajo e nevojshmja.
Deri në 2013-2014, ky numër ishte rritur në 18.2%.
Përdorimi i suplementeve të vitaminës D është rritur gjatë periudhës së studimit në shumicën e grupeve dhe etnive, për të dyja gjinitë.
Por së bashku me shqetësimet rreth niveleve të rrezikshme të kalciumit, doza e lartë e vitaminës D ka qenë gjithashtu e lidhur me rritjen e rreziqeve të frakturave të kockave apo gurëve në veshka.
Disa studime vëzhguese kanë lidhur nivelet e larta të vitaminës D me normat më të larta të kancerit të prostatës, kancerit të pankreasit dhe vdekjes së hershme.
Suplementet me vitaminë D nuk janë të rekomanduara për të rriturit e shëndetshëm të cilët nuk kanë simptoma të mungesës së kësaj vitamine.
Lexo edhe: Vitamina D, cila eshte masa e duhur?
Për të lënë një koment ju duhet të jeni regjistruar Identifikohu