Në këtë diagnozë klasifikohen të gjitha ato femra që kanë 3 ose më shumë  humbje radhazi të shtatzanisë para javës së 20. Është një situatë që shkakton një stres të madh emocional dhe dyshime për të ardhmen e një femre. Shumë paciente bien në dëshpërim dhe kanë ndjesinë e mungesës së shpresës për tu bërë nënë. Megjithatë, duhet të kemi parasysh se rreth 70% e femrave që përjetojnë 3 humbje të përsëritura të shtatzanisë do të bëhen nëna në shtatzanitë e ardhshme. Kjo sidomos kur drejtoheni tek specialisti i duhur që është i aftë të sugjerojë analizat e duhura, të vendosë diagnozën korrekte, trajtimin dhe mjekimin e duhur. CIlat janë shkaqet?

Sindroma anti-fosfolipidik – është një çrregullim i fituar në një moment të jetës, e cila shkakton tendencë mpiksje të gjakut. Kjo sindromë shfaqet në 15 – 20% të femrave me humbje të përsëritur të shtatzanisë.

Trombofilia – është një çrregullim i lindur. Ashtu si edhe sindroma anti-fosfolipidike, edhe ajo përfaqëson një tendencë të gjakut për tu mpiksur. Dallimi është se trombofilia është e trashëguar ndërkohë që sindroma anti-fosfolipidike nuk është e lindur por fitohet në një moment të jetës. Trombofilia shfaqet në 15- 20 % të femrave me humbje të përsëritur të shtatzanisë.

Shkaqet gjenetike – Në 2-5% të pacienteve me humbje të përsëritur të shtatzanisë, femra  ose partneri i saj mund të kenë një anomali të kromozomeve e cila mund të shfaqet vetëm kur kalohet tek bebi duke shkaktuar kështu abort.

Anomalitë e lindura të mitrës – Dihet që humbja e shtatzanisë është më e shpeshtë tek femrat me septum (perde) të mitrës.

Anomalitë e fituara të mitrës – Në një pjesë të rasteve, miomat, polipet mund të shkaktojnë edhe ato humbje të shtatzanisë për shkak të deformimit të kavitetit endometrial i cili është vendi ku zhvillohet shtatzania.

Shkaqet imunologjike – Për arsye të ndryshme, embrioni cilësohet si “i huaj” nga sistemi imunitar i nënës i cili prodhon anti-trupa të cilët e luftojnë embrionin.

Mosha – Me kalimin e viteve, rezerva e vezëve pëson ndryshime të rëndësishme. Përveç reduktimit në sasi, kemi edhe reduktim në cilësi. Dhe cilësia e vezës  përcillet edhe tek cilësia e embrionit. Me reduktimin e cilësisë së vezëve kemi më tepër anomali  gjenetike tek embrioni për shkak të defekteve në fertilizim.

Çfarë duhet të bëjmë?

Në këto raste duhet të zgjidhni një specialist fertiliteti dhe jo një gjinekolog të thjeshtë. Kjo për arsyen e thjeshtë se një specialist në fushën e fertilitetit ka njohuritë e duhura mbi shkaqet e sipërpërmendura dhe për rrjedhojë nuk do të humbisni kohë apo resurse financiare të panevojshme në arritjen e objektivit: të paturit e një shtatzanie deri në fund.

Lexoni dhe: 7 arsyet me te shpeshta te abortit spontan

Marre nga dreltonpeci.al
')}