Lazanja është një pjatë tipike e italiane, e në mënyrë të veçantë e zonës së Bolonjës. Kjo pjatë është e njohur tashmë jo vetëm në këtë zonë, por në mbarë botën. Lazanja është një pjatë e parë, e pasur me vlera ushqyese dhe shumë e shijshme.
Përbërësit:
- 1 pako me petë lazanje;
- 1 qepë;
- 1 karotë;
- Mocarela ose djathë për pica;
- 1 degë selino;
- Mish të grirë 500gr;
- Djathë të grirë parmixhan 200g;
- Salcë domatesh rreth 1 shishe;
- 2 lugë vaj;
- Kripë;
- Piper;
- Borzilok;
- Salcë beshamele.
Pergatitja:
- Në një tenxhere me vaj, kavërdisim lehtë qepën, karotën dhe degën e selinosë të prerë imët. Shtojmë mishin e grirë dhe e lëmë mbi zjarr të embël, derisa të pinë lëngjet e veta.
- I rregullojmë me kripë e piper dhe i shtojmë salcën dhe pak ujë, për ta bërë të hollë dhe në fund i hedhim borzilokun.
- Ndërkohë përgatisim 1/2 lt salcë beshamele.
- Në një tavë, hedhim pak salcë mbi siperfaqe dhe vëmë shtresën e parë me petat e lazanjës. Mbi të hedhim djathë të grirë, copa mocarelash dhe beshamelë. Veprojmë kështu për 4 shtresa që lazanja mos të jetë e rëndë dhe e trashë shumë ( duke pasur parasysh qe petët fryhen se janë me vezë).
- Sipër, mbi shtresën e fundit, mbi beshamelë e salcë, hedhim djathin e grirë, që gjatë pjekjes të krijojë koren aq të shijshme.
- E pjekim ne 200° derisa të marrë ngjyrë. E lëmë të pushojë të paktën 20 minuta pas nxjerrjes nga furra dhe e shërbejmë të ngrohtë.
- Sipas dëshirës, mund të shtojmë dhe copa proshute, duke patur parasysh që sa më shumë përbërës i vemë, aq më e rëndë në kalori bëhet.
- Ju bëftë mire!
Lexoni dhe: Si te gatuajme qofte peshku?
Për të lënë një koment ju duhet të jeni regjistruar Identifikohu