Prematurë konsiderohen të gjithë ata fëmijë që vijnë në jetë para javës së 37-të të shtatëzanisë dhe me një peshë të vogël trupore. Ecuria e rritjes së këtyre fëmijëve që vijnë në jetë më shpejt se data e parashikuar për lindje është shumë e rëndësishme dhe për këtë arsye, parametrat e rritjes dhe zhvillimit janë në kontroll të vazhdueshëm përgjatë 2 viteve të para të jetës. Që kjo rritje dhe ky zhvillim të ketë ecurinë e duhur është shumë e rëndësishme që fëmija të ushqehet në mënyrën dhe sasinë e duhur.

Por, cila është mënyra e duhur për të ushqyer një fëmijë prematurë?

Duhet të theksojmë se rritja e një bebe të ardhur në jetë para javës së 37-të të shtatëzanisë është e ndryshme nga ajo e një bebe të ardhur në jetë më afër datës së parashikuar për lindje, dhe kjo pasi ushqyerja e tyre është e ndryshme. Fëmijët prematurë shfaqin vështirësi në koordinimin e procesit të gëlltitjes dhe marrjes frymë në të njëjtën kohë. Nëse fëmija ka peshë më të vogël se 1 kg, ushqyerja bëhet me anën e pikave, ndërsa nëse pesha është më e madhe se 1.5 kg ushqyerja bëhet me anën e tubave.

Ushqyerja me gji e fëmijëve prematurë

Kështu do të vazhdohet të kryhet ushqyerja me qumësht e një fëmije prematurë duke rritur gradualisht sasinë e qumështit, në varësi të maturimit të sistemit tretës. Gjatë kohës që fëmija ndodhet në inkubator nëna duhet të nxjerrë me pompë qumështin e saj, i cili konsiderohet “floriri i bardhë” që do të ndihmojë fëmijën të rritet, të forcojë sistemin imunitar si edhe të mos zhvillojë intolerancë ushqimore. Në momentin e ushqyerjes me ushqime të ngurta fëmija duhet të hajë si të gjithë fëmijët e tjerë, dhe kjo ushqyerje të fillohet në kohën që normalisht fillojnë të gjithë fëmijët (6 muajsh). Nëse fëmija nuk ha dhe ka probleme me rritjen duhet të jetë nën vëzhgimin e mjekut pediatër.

Lexoni edhe: Femijet premature, gjerat qe duhet te dini