Goja është një mjet të cilën fëmija e përdor për të njohur botën që e rrethon. Kjo fillon me futjen e vazhdueshme të duarve në gojë, për të vazhduar më pas me futjen e objekteve që gjen nëpër shtëpi, të cilat mund të jenë lodrat, çarçafi, fytyra e nënës, ushqimi etj. Kjo i mundëson laktantit të njohë formën dhe shijen e ndryshme të sendeve që e rrethojnë dhe për pasojë krijon me to njëfare lidhje. Kjo quhet faza orale, dhe ndërkaq në këtë fazë ai përmirëson në zhvillimin neuro-psikologjik.

Funksioni oral është e para që zhvillohet tek fetusi, pa harruar të përmendim këtu se ai fillon të zhvillojë refleksin e thithjes në javën 10-të, dhe të gëlltitjes në javën e 15-të. Nëse fëmija lind në term, është në gjendje të thithë qumështin në mënyrë natyrale, dhe nëse ai lind parakohe kjo aftësi nuk do të jetë e zhvilluar plotësisht. Në muajin e 3-të të jetës, fëmija fillon të zhvillojë refleksin e zgjatjes së gjuhës, me anën e së cilit ai refuzon pothuajse çdo gjë që nuk ka shijen e qumështit, refleks i cili fillon të zhduket rreth muajit të 6-të, moment që konsiderohet si më i përshtatshmi për të filluar ushqimet e ngurta. Rreth muajit të 6-të fillojnë të dalin edhe dhëmbët e parë, ndryshon flora bakteriale e pranishme në kavitetin oral si edhe fillon të vërehet një njohje e objekteve që fëmija fut në gojë.

Pra, nëse në momentin e lindjes proçesi thithje-gëlltitje është një refleks i lindur, në muajin e 6-të fillon një proçes tjetër, ai i përtypje-gëlltitjes, e cila lidhet me maturimin neuro-sensorial, gjë e cila mundëson një koordinim më të mirë tru, dorë, gjuhë, përtypje, gëlltitje. Fëmija fillon të jetë më i dhënë pas të ngrënit dhe fillon të krijojë shijet e tij të prefruara, dhe kjo falë praktikës së tij të përditshme në ushqyerje.

Në fillim do të bëhet shijimi i ushqimeve në formë pureje, i atyre gjysëm të lëngshme, më pas i ushqimeve më të ngurta të cilat do të realizohen duke e përdorur më pak frulatorin, gjë e cila duhet të fillojë rreth muajit 8-9 në mënyrë që fëmija të fillojë të mësojë refleksin e përtypjes së ushqimeve. Në fillim fëmija mund të shfaqë një refuzim ndaj përtypjes, por ju duhet të insistoni pasi përtypja është shumë e rëndësishme për strukturën e gojës, e cila duke u formuar favorizon zhvillimin e muskujve të fytyrës dhe lejon rritjen e mirë të kockave të kafkës. Rreth moshës 2-vjeçare, fëmijët janë në gjendje të përtypin dhe hanë pothuajse gjithcka, duke e bërë aktin përtypje-gëlltitje një proçes shumë natyral, të cilat janë shumë të rëndësishme për mbijetesën e njeriut.

Çfarë duhet të bëjmë nëse fëmija refuzon të përtypet?

Zakonisht kjo ndodh tek fëmijët të cilët shfaqin refuzim ndaj të gjitha ushqimeve në përgjithësi, dhe kjo zakonisht ndodh nëse fëmijës i bëhet një prezantim i vonë i ushqimeve. Ja disa këshilla për të favorizuar një proçes shumë natyral përtypje-gëlltitje:

1- Filloni në kohën e duhur prezantimin ushqimeve të ngurta;
2- Mos e detyroni fëmijën të hajë diçka që nuk do;
3- I paraqisni fëmijës ushqime të cilat nuk janë të bluara plotësisht, sidomos nëse ai ka uri;
4- E lejoni fëmijën të luajë me ushqimin, ta prekë, të hajë vet, sepse kjo është një mënyrë e mirë që ai ta njohë;
5- Mos ushtroni presion tek fëmija;
6- Jini gjithmonë prezent gjatë ushqyerjes së fëmijës;
7- Gjatë ushqyerjes mos favorizoni një lojë tjetër, në mënyrë që fëmija të jetë i përqëndruar tek ushqimi;
8- Uleni të hajë në tavolinë me ju në mënyrë që të shohë si bëhet proçesi, gjë e cila do të favorizojë mësimin më shpejt të veprimeve që kryhen në tavolinë.

Fëmija pas muajit të 6-të jo vetëm e ka më të maturuar stomakun, por edhee sistemin imunitar, inteligjencën, aftësitë motorike, aftësinë e përtypjes. Në këtë fazë fillon të largohet antkhi i sterilizimit, fëmija fillon të qëndrojë më mirë ulur, mëson më shumë të hajë vetë, e pranon më lehtë ushqimin që futet në gojën e tij, dhe tregon interes ndaj ushqimeve që hanë të tjerët. Tregoni durim pasi fillimi mund të jetë i vështirë.

Lexoni edhe: 7 ushqimet qe bebi mund te mbaje ne dore