Sipas një studimi të ri, marrja e qetësuesve në shtatzani mund të ketë efekte negative në fertilitetin e bebit në të ardhmen gjatë jetës së tij. Sipas studimit marrja e këtyre medikamenteve në shtatzani ndikon në fertilitetin e brezave të ardhshëm pasi mund të ndryshojë ADN-në e tyre.

Zbulimet e këtij studimi i shtohen zbulimeve të studimeve të mëparshme të cilat sugjerojnë se disa medikamete të caktuara, përfshirë dhe paracetamolin duhet të përdoren me shumë kujdes në shtatzani. Studiuesit vazhdojnë të mbështesin sugjerimin se paracetamoli mund të përdoret në shtatzani por vetëm nëse është vërtet shumë i nevojshëm dhe në doza shumë të ulëta për një periudhë të shkurtër kohore. Ndërsa për sa i përket ibuprofenit, ekspertët sugjerojnë shmangien e plotë gjatë shtatzanisë.

Nga eksperimentet e kryera në laboratorët e Universitetit të Edinburgut mbi kafshët dhe qelizat njerëzore, shkencëtarët zbuluan se ekspozimi 1 javor ndaj paracetamolit bënte që numri i qelizave të cilat kishin si funksion prodhimin e vezëve te vajzat, të  binte me 40%. Ndërsa ekspozimi ndaj ibuprofenit bënte që këto qeliza të humbisnin lëvizshmërinë dhe funksionet e tyre. Kjo gjë mund të shkaktojë menopauzë të hershme te vajzat si dhe mundësi më të ulëta për të ngjizur një fëmijë.

Por ekspozimi ndaj qetësuesve në shtatzani mund të ndikojë edhe te djemtë gjithashtu. Studimi zbuloi se kur indet e testikujve ekspozoheshin ndaj këtyre medikamenteve, djemtë kishin rreth 70% më pak qeliza përgjegjëse për prodhimin e spermatozoidëve, gjë që e ulte ndjeshëm fertilitetin e tyre.

Dr. Rod Mitchell autori kryesor i studimit tha se: “Ne duhet t’i inkurajojmë gratë të mendojnë me kujdes përpara se të përdorin medikamente për qetësimin e dhimbjeve në shtatzani dhe të ndjekin udhëzimet e ekspertëve, duke marrë dozën më të vogël të mundshme për një periudhë sa më të shkurtër kohore”.

Lexoni dhe: 8 medikamente qe nuk duhet t’i perdorni tek femijet e vegjel