Kur e kam pyetur mjekun tim gjinekolog në lidhje me valixhen e maternitetit nuk më foli aspak në lidhje me qumështin e formulës, e madje pasi linda mbaj mend se erdhi pranë meje në dhomë dhe më tha “mos e ler të flejë, kape vendose në gji!” Ndërkohë unë nuk i thashë se ai sapo kishte pirë qumësht formule nga infermieret të cilat ma kërkuan para se të futem në sallë kutinë e qumështit dhe biberonin. Gjithmonë mendoja se nuk isha unë e aftë të prodhoja mjaftueshëm qumësht, por ndryshova mendim kur lexoja vazhdimisht artikuj në lidhje me qumështin e gjirit dhe efektit të ushqyerjes me formulë.
Sot për shembull rastësisht lexova një artikull të publikuar në “Parenting.com” ku flitej pikërisht në lidhje me ndikimin që qumështi i formulës (i kërkuar apo dhuruar nga vetë mjekët) kishte në stabilizimin e gjidhënies. Këtë veprim “American academy of pediatrics” e quan të gabuar, dhe preferojnë të tregojnë edhe njëherë për efektet që qumështi i gjirit ka në lidhje me rrëzikun e alergjive, astmës, obezitetit, dhimbjeve të veshit, etj.
Sipas studimeve të bëra nga “Centers for disease control and prevention”, gratë që kanë ushqyer fillimisht fëmijën me formulë janë më tepër të prirura për të pasur një gjidhënie e probleme pasi sa më pak fëmija thith (si pasojë se ngopet edhe me formulë) aq më pak qumësht do të prodhohet.
Sipas një studimi të publikuar në “The journal of nutrition”, dhurimi dhe këshillimi i qumështit të formulës ka ardhur duke u praktikuar nga mjekët rreth vitit 1950 duke qënë se ata filluan të përfshihen në fushata marketingu dhe në vitin 1970 rreth ¾ e bebeve ne Amerikë ushqeheshin me formulë.
Kohë më vonë, u ndalua praktika e dhurimit të pakove që përmbanin qumësht formule në spital dhe kjo ndodhi fillimisht në Filadelfia si pasojë e problemeve që ushqyerja me formulë mund të sillte në gjidhënie.
Pra nëse shkoni për të lindur dhe ju këshillojnë një qumësht formule (që e bëjnë në më të shumtën e rasteve edhe në strukturat shtetërore) mos pranoni. Në vend të kësaj kërkoni që t’ju vendosin fëmijën në kontakt me lëkurën tuaj menjëherë edhe nëse keni pasur një lindje me operacion. Sa më shpejt e fusni në gji dhe kështu do ta keni më të lehtë të stabilizoni gjidhënien e mirë.
Lexoni edhe: Eshte normale te kombinojme qumeshtin e gjirit me te formules?
')}
Për të lënë një koment ju duhet të jeni regjistruar Identifikohu