Ju këshillojmë që të ushqeni vetëm me gji fëmijën deri në muajin e 6-të të tij, dhe nëse për një arsye të caktuar fëmija ushqehet me formulë, ta vazhdoni këtë gjithashtu deri në këtë periudhë. Nëse tashmë mendoni se fëmija juaj është gati të fillojë ushqimet e ngurta duhet të dini se cilat janë 10 ushqimet që duhet të evitoni.

1. E bardha e vezës. Ky ushqim ka tepër proteina dhe për pasojë është i dëmshëm për bebet nën moshën 1-vjeçare, pasi në të kundërt mund të shkaktojë probleme në stomak apo komplikacione të tjera.
2. Gjalpi i kikirikut. Është i pasur me kalium, proteina dhe fibra, e megjithatë forma e tij mund të shkaktojë probleme tek dhëmbët e fëmijës.
3. Perimet e pagatuara. Ato janë shumë të shëndetshme deri në momentin që i jepen fëmijës në formën e duhur, pasi në të kundërt mund të kthehen në faktor rreziku si për shembull karrota e gjallë, e cila mund të shkaktojë mbytje tek fëmija.
4.  Arrat. Janë të pasura me fibra, vitamina etj, e megjithatë nëse i jepet fëmijës e plotë mund të shkaktojë gjithashtu mbytje.
5. Ushqimet e konservuara. Këto ushqime mund të shkaktojnë sëmundjen e botulizmit (infeksion tepër serioz që shkaktohet nga bakteri i botulinës) si edhe infeksione të tjera bakteriale.
6. Peshku. Disa lloje peshku (kryesisht ai i përmasave të mëdha), ka përmbajtje të lartë merkuri dhe nëse i jepet fëmijës në një moshë të papërshtatshme mund të dëmtojë shëndetin e tij.
7. Mjalti. Ai përmban spore të cilat shkaktojnë infeksionin e botulizmit tek bebet.
8. Lëngjet e frutave. Lëngjet e përgatitura në shtëpi janë të shëndetshme, të kundërtën duhet të themi për ato industriale që janë plot me substanca të dëmshme.
9. Qumështi i lopës. E ritheksojmë, në asnjë mënyrë nuk duhet të pihet nga fëmija para vitit të parë të jetës. Ai përmban proteina dhe minerale jo të mira për një bebe nën 12 muajsh.
10. Lëngjet e agrumeve. Ato janë të pasura me vitaminë C dhe kalium, por gjithashtu kanë edhe aciditet të lartë. I evitoni ato deri në moshën 1-vjeçare të fëmijës.

Lexoni edhe: Ushqyerja e femijes, 6 keshilla per ta bere sa me te shendetshme