Vizita e parë duhet të kryhet sapo të dyshoni se jeni shtatzanë. Vizita e parë para lindjes nënkupton takimin tuaj të parë me mjekun tuaj gjinekolog, me të cilin do të jeni në kontakt gjatë gjithë shtatzanisë si edhe në momentin e lindjes.
Në çfarë moshe të shtatzanisë duhet të kryhet vizita e parë?
Sa më herët që të jetë e mundur, sapo të mungojnë periodat (që ndryshe ju i quani: zakonet, cikli menstrual ose menstruacionet), sidomos kur i keni pasur të rregullta. Duhet të keni parasysh se llogaritja e moshës së shtatzanisë bëhet duke u nisur nga dita e parë e periodave të fundit. Ju duhet të caktoni menjëherë se cili është mjeku që do të ndjekë ecurinë e shtatzanisë tuaj, dhe duke qënë se kjo ndonjëherë është diçka e vështirë, mund të pyesni edhe nëna të tjera.
Cilat janë qëllimet e vizitës së parë para lindjes?
- Të nxirret në pah një histori e hollësishme mjekësore familjare dhe personale;
- Të bëhet një vizitë e hollësishme fizike e të gjitha sistemeve të organizmit;
- Të përcaktohet saktë mosha e shtatzanisë dhe dita e parashikuar për lindje;
- Të bëhen analizat bazë laboratorike (gjendja e numrit të rruazave të kuqe të gjakut, grupi i gjakut dhe Rhezusi, gjendja e veshkave, nëpërmjet analizës së urinës, pastërtia vaginale etj.)
- Të vlerësohet nëse shtatzania është brenda mitrës, ka ndonjë rrezik të veçantë apo ka ecuri normale.
Lexoni edhe: Kontrollet dhe kujdesi ne shtatzani
Për të lënë një koment ju duhet të jeni regjistruar Identifikohu