Lindje e parakohshme do të quhet ajo që ndodh midis javës së 20 dhe 37 së shtatzanisë, duke marrë parasysh që shumica e shtatzanive zgjat rreth 40-42 javë. Sa më herët të lindë fëmija aq më shumë komplikacione do të shfaqë dhe anasjelltas. Ndoshta keni dëgjuar raste të fëmijëve që edhe pse kanë lindur në një fazë të hershme të shtatzanisë, me kalimin e kohës kanë gëzuar shëndet të plotë. Por, duhet të dini se jo gjithmonë është kështu dhe se një fëmijë i lindur parakohe është mjaft i rrezikuar për ta pasur probleme cerebrale, probleme në frymëmarrje, në tretje, si edhe fatkeqësisht ata janë mjaft të rrezikuar për të ndërruar jetë gjatë ditëve të para pas lindjes. Gjithashtu këta fëmijë mund të shfaqin edhe probleme me kalimin e kohës si për shembull prapambjetje në zhvillim.
Duke qënë se lindja e parakohshme mund të ndodhë në shumë raste, është mirë të njihen të gjitha rreziqet e saj si edhe mënyra si prindërit duhet të kujdesen për fëmijën e vogël. Duke ndjekur këshillat e mjekut dhe marrë informacionet e duhura ju do ta keni më të lehtë t’i përgjigjeni nevojave të fëmijës, dhe në lidhje me këtë do të jenë shumë të vlefshme edhe këshillat e nënave që kanë kaluar një eksperiencë të tillë. Duke qënë kështu është diskutuar ditën e enjte në “Koha të bisedojmë” në lidhje me vështirësitë dhe problemet shëndetësore që fëmijët kanë shfaqur nëse kanë pasur një lindje të parakohshme.
Sipas nënave…
Me kujdesin e duhur dhe ndihmën e mjekëve fëmija gëzon shëndet të mirë!
- Djalin e kam lindur në javën e 35+4 dhe tani e kam 8 vjeç. Ai gëzon shëndet të mirë dhe nuk kam vuajtur nëpër spitale me të. Gjithsesi mendoj se varet edhe nga fëmija.
- Unë e kam sjellë në jetë fëmijën tim në javën e 36 por me një peshë shumë të vogël, vetëm 2 600 gr dhe ishte bebi me peshën më të vogël në maternitet. E shikoja çdo ditë dhe qaja për 1 muaj rresht por djali fatmirësisht më mori peshë dhe zhvillim shumë të mirë. Ka pasur shëndet të mirë dhe kam vuajtur vetëm me bllokimin e hundëve apo sekrecionet. Vetem gjidhënia është peng për mua pasi nga stresi më iku qumështi.
- Kam lindur djalin në javën e 31+6 dhe me peshë 1 700 gr. Ishte aq i vogël sa nuk e imagjinoni dot, por fatmirësisht tani gëzon shëndet të mirë.
A ka nevojë për një kujdes specifik një fëmijë prematurë?
Ata nuk janë shumë të përgatitur për të përballuar jetën jashtë uterusit pasi ende një pjesë e organizmit nuk është zhvilluar në mënyrën e duhur dhe konkretisht flasim për mushkëritë, aparatin tretës, sistemin imunitar dhe lëkurën. Megjithatë jetojnë në një kohë kur teknologjia ka ecur shumë përpara dhe mundësitë për të rikuperuar janë të mëdha. Këta fëmijë do të mbahen nën kontroll të vazhdueshëm derisa mjeku të përcaktojë momentin e kthimit në shtëpi.
Fëmija ka nevojë për kujdes në ushqyerje e cila mund të bëhet nëpërmjet hundës, gojës, katererit ombelikal, si edhe në mënyrë intavenoze. I porsalinduri gjithashtu qëndron në inkubator dhe merr trajtim në lidhje me verdhëzën.
Trajtimi kangur është gjithashtu shumë i rëndësishëm sepse:
- Ndihmon në rregullimin e temperaturës së trupit;
- Ndihmon në gjidhënie;
- E bën fëmijën të bjerë në gjumë të thellë dhe për pasojë të fitojë më tepër energji. Kështu edhe pesha e tij do të rritet më shpejt;
- Marrëdhënia me nënën forcohet së tepërmi.
E prekni sa më shumë fëmijën tuaj, e prekni lehtë dhe me shumë dashuri. Gjithashtu i flisni, ai dëgjon të gjitha fjalët tuaja. I jepni shumë dashuri dhe mendoni gjithmonë pozitivisht!
')}
Për të lënë një koment ju duhet të jeni regjistruar Identifikohu