Shpesh na ndodh që disa gjëra t’i mbajmë vetëm për veten tonë, të mos i ndajmë me të tjerët. Pra mundësitë që gjithsecili të ketë një sekret ekzistojnë realisht. Mbase partneri juaj mund të ketë një sekret, shoqa juaj e ngushtë mund të ketë një sekret gjithashtu, madje edhe mamaja juaj mund të ketë një sekret që as ju s’mund ta dini. Sipas një studimi të publikuar vitin e shkuar në “Journal of Personality and Social Psychology” njerëzit kanë mesatarisht 13 sekrete dhe shumica e tyre eshtë e natyrës seksuale, një veprim apo një mendim jashtë marrëdhënies tuaj aktuale. Por sekretet, të “mëdhenj” apo të “vegjël” duket se kanë një ndikim negativ në marrëdhënien tuaj romantike, edhe nëse ju vetë nuk e vini re.

Sekretet në një marrëdhënie jo vetëm që janë të zakonshëm por sipas studimit ato mund të kenë  efekte negative në shëndetin tuaj mendor dhe atë fizik. “Sekretet përbëjnë një problem pasi mendja e njerëzve ka tendencën të vërtitet shpesh rreth tyre, gjë që mund të shkaktojë stres dhe t’i bëjë njerëzit më pak të lumtur”, tha profesor Michael Slepian nga “Columbia Business School”, autori kryesor i studimit të përmendur më sipër.

Studimi i Slepian është një nga studimet më të reja që studion efektet e mbajtjes së sekreteve. Sipas një studimi më të vjetër, të zhvilluar në vitin 2012, mbajtja e sekreteve nga partneri do të bëjë që ai të humbasë besimin tek ju, gjë që krijon një cikël veprimesh që mund të dëmtojnë marrëdhënien tuaj.

Gjithashtu studiuesit belgë zbuluan se mbajtja e sekreteve mund të shkaktojë më shumë efekte negative në shendet si dhe një ndjenjë faji dhe turpi më të madhe se çdo të shkaktonte rrëfimi i tyre. Studimi zbuloi se rrëfimi i sekreteve duket se i ndihmon njerëzit të ulin nivelin e stresit dhe të rrisin vetëvlerësimin, por vetëm nëse marrin një përgjigje pozitive nga personi të cilit i rrëfyen sekretin.

Por  sipas Dr. Karl Pillemer nga “Cornell University” nuk është 100% e sigurt nëse themi se rrëfimi i sekreteve do ta përmirësojë marrëdhënien tuaj pasi shumë nga studimet e kryera deri tani janë studime të vogla për tu marrë në kosideratë dhe përkthimi i të dhënave të nxjerra prej tyre mund të mos jetë konvertuar siç duhet në sjelljen e vërtetë njerëzore.

Lexoni dhe: 7 sekretet qe te gjithe prinderit e rinj duhet te dine ne lidhje me marredhenien seksuale
')}