Rikthimi në formë pas lindjes së bebes është një proçes që kërkon kohën e duhur dhe ndikohet shumë edhe nga kushtet e fizikut tuaj. Pra nëse para shtatzanisë keni pasur një trup të tonifikuar do ta keni më të lehtë të rikuperoni edhe pas lindjes. Në përgjithësi, është një proçes që kërkon kohë të ndryshme për gra të ndryshme. Zakonisht pesha më e madhe fillon të bjerë gjatë gjidhënies, dhe ky është pikërisht një prej efekteve pozitive që ka ushqyerja me gji.
Në rëniën nga pesha do të ndikojnë edhe faktorë të ndryshëm, si ushqyerja, aktiviteti fizik, konsumi i pijeve me gaz etj. Duke qënë se shpesh nënat e reja nuk arrijnë të gjejnë mënyrën e duhur për të rënë nga pesha pas lindjes, kemi zhvilluar ditën e enjte në “Koha të bisedojmë” një diskutim që i referohej pikërisht këtij shqetësimi. Nënat kanë shprehur eksperiencat e tyre, të cilat mund të jenë shumë të vlefshme për nënat e tjera.
Disa nëna mendojnë se aktiviteti fizik i ka ndihmuar shumë:
-
Pas nje viti fillova të bëja aktivitet fizik dhe më ndihmoi shumë. Më parë nuk bëja asgjë sepse mendoja t’i jepja kohë trupit të rikuperonte.
-
Kam bërë ushtrime fizike në shtëpi një muaj pas lindjes dhe kam humbur të gjitha kilet e marra në shtatzani. Tani kam filluar sërish t’i bëj me shpresën të rrëzoj kg që mora pasi i nderpreva.
-
Kam 6 muaj që kam lindur dhe tashmë jam në peshën time normale por mendoj se u dobësova shumë jo vetëm nga pagjumësia por edhe nga aktiviteti fizik.
-
Unë kam 9 muaj që kam lindur dhe kam rrëzuar peshën që mora megjithatë ende kam nevojë për punë në zonën e barkut. Mendoj se ushtrimet fizike që kam filluar janë duke më ndihmuar shumë.
Për disa nëna rikuperimi do të ketë ndodhur në mënyrë natyrale, pra pa bërë një veprim specifik apo dietë ushqimore!
-
Peshës nuk i kam kushtuar rëndësi të madhe por 2 muaj e gjysëm pas lindjes më duhej të punoja dhe brenda 3 muajve kam humbur 20 kg.
-
Nuk kam bërë asgjë për të rënë nga pesha megjithatë tashmë kam humbur 16 kg. Mund të them se kam nevojë të shtoj ende disa kg.
-
Nga pesha rashë menjëherë pa bërë asgjë dhe madje humba aq shumë sa bashkëshorti më sillte ushqime të ndryshme vetëm që të fitoja sërish disa kile.
Pra edhe nga eksperiencat e nënave vihet re se asnjë proçes rikuperimi nuk është i njëjtë, e rëndësishme është që ju të humbni peshën e shtatzanisë në mënyrë të shëndetshme. Pra duhet të evitoni përdorimin e çajrave dobësues “mrekullibërës” që ju bëjnë të humbni 30 kg në një muaj, të ndiqni dieta të forta apo qëndroni pa ngrënë ushqim. Nëse do të bëni këto veprime do të rrezikoni që trupi juaj të mos marrë elementët ushqyes që i nevojiten. Ju duhet të konsumoni të gjitha ushqimet, por duhet të keni kudjes me sasinë e tyre.
Duhet t’i themi jo dietave?
Pas lindjes trupi ka nevojë të rikuperojë dhe nëse jeni nënë gjidhënëse do të keni nevojë për disa kalori më tepër. Në vend të dietave që do t’ju bëjnë të ndiheni edhe më të dobëta dhe pa energji (të cilat pas lindjes bien në mënyrë spontane) do të ishte mirë të konsumonit ushqimet e duhura. Pra perimet e ziera apo të pjekura, mishin e bardhë, sallatat e ndryshme që mund të shoqërojnë vaktet kryesore, frutat e thata mes vakteve, kosin me fruta, frutat e prera në copa, ujë sa më shumë etj. Duhet të evitoni ushqimet e skuqura, fast-foodet, pijet me gaz dhe sheqer, ëmbëlsirat dhe brumërat. Preferoni më tepër produktet integrale dhe bëni sa më shumë aktivitet fizik.
Aktiviteti fizik do të ketë efekte pozitive jo vetëm në lidhje me peshën por edhe me depresionin pas lindjes, si edhe qetësimin e fëmijës. Nëse dikush ju këshillon të qëndroni brenda 40 ditët e lehonisë do të ishte mirë të mos i dëgjonit pasi në këtë mënyrë mund të bëhen serioze edhe simptomat e depresionit që prek të gjitha nënat e reja.
Dhe mbi të gjitha, ndjehuni mirë me veten dhe trupin tuaj. I jepni kohë të rikuperojë në mënyrë natyrale duke e favorizuar me anën e këshillave të mësipërme. Tashmë jeni nënë, jeni grua dhe sigurisht keni nevojë të ndiheni e bukur edhe duke pasur një fizik perfekt, por kjo nuk do të thotë se duhet të bëni veprime që dëmtojnë seriozisht shëndetin tuaj!
Nga nenat pernenat
Lexoni edhe: Si e tonifikojme gjoksin pas lindjes
')}
Për të lënë një koment ju duhet të jeni regjistruar Identifikohu