Ky është një problem që prek rretj 1 në 100 fëmijë, por si mundet një prind të njohë se fëmija i tij është alergjik ndaj glutenit?

Fëmijët dhe alergjia ndaj glutenit

Në këtë rast i referohemi problemit së njohur me emrin çeliaki, e cila prek zorrët duke limituar aftësinë e tyre përthithëse ndaj elementëve të marra nga ushqimet e tilla si: gruri, tërshëra etj të cilat përmbajnë proteinën e quajtur gluten. Në momentin që një fëmijë me alergji ndaj glutenit konsumon një ushqim të tillë, do të përballet me një irritim të mukozave të zorrës dhe kështu absorbimi i elementëve të ushqimeve do të pengohet dhe zorrët nuk do të kryejnë funksionin e tyre në mënyrën e duhur.

Sinjalet që tregojnë se fëmija është alergjik

• Të vjella, diarre dhe probleme me stomakun. Mund të ngatërrohet me një gjendje virale, por problemi zgjat më tepër.
• Rënie të flokëve dhe ngjyrë shumë të zbehtë. Këto simptoma lidhen me përthithjen jo të mirë të ushqimeve e cila pasqyrohet edhe në shëndetin e flokëve, lëkurës dhe thonjve, të cilat gjithashtu do të kenë një pamje jo të shëndetshme.
• Bark i fryrë. Në këtë rast, një fëmijë alergjik do të ketë trup të hollë por bark të fryrë. Përpiquni të largoni sa më parë glutenin nga dieta e tij.
• Vonesë në rritje. Fëmija juaj rritet pak dhe shumë ngadalë në krahasim me vlerat normale. Kjo mund të mos shoqërohet me probleme intestinale, dhe në këtë rast do të quhet alergji e fshehur. Lezionet intestinale do të ekzistojnë edhe në këtë rast tek fëmija.

Duhet të flisni patjetër me mjekun në rast se dyshoni për alergji ndaj glutenit tek fëmija juaj. Ajo nuk është një sëmundje por një problem me të cilin mund të mësoheni të jetoni mjafton të ndryshoni disa zakone në familjen tuaj.