Blogerët e modës së fundmi kanë krijuar një trend të ri, atë të publikimit të fotove të fëmijëve nëpër rrjete sociale. Duke promovuar rroba dhe aksesorë të ndryshëm, fëmijët bëhen pjesë e botës virtuale të mbushur me pëlqime, komente, bëhen qendra e vëmendjes dhe kjo mund të duket si diçka pozitive në pamje të parë. Por, në një gjykim pak më të thellë lind pyetja a është e dëmshme gjithë kjo vëmendje për fëmijët? A është mirë që ata të përdoren si imazh i kompanive të ndryshme, apo qoftë edhe të publikohen nga vetë prindërit si personazhe me shumë stil dhe të veshur shumë bukur? A nuk janë shumë të vegjël për diçka të tillë?
Mendime të ndryshme për fëmijët si imazh në rrjetet sociale
Edhe në këtë çështje si në shumë të tjera, grupet e mendimeve janë tërësisht të pozicionuara në kahe të kundërta. Disa mendojnë se reklamimi i produkteve të modës duke përdorur si imazh fëmijët, nuk ka asgjë të keqe, ndërsa të tjerë janë plotësisht kundër një praktike të tillë.
Diçka e bukur
Ata që janë pro thjesht fokusohen tek aspekti estetik i temës dhe pohojnë me të drejtë se është diçka shumë e bukur të shikosh fëmijët aq të kuruar dhe të bukur në pamje.
E dëmshme për fëmijët
Ndërsa pjesa tjetër mendon se përtej anës fizike, që duhet pranuar është shumë e bukur, nuk është mirë të përdoren fëmijët që ende nuk e dinë nëse kur të rriten do e dëshirojnë diçka të tillë. Nga ana tjetër prindërit dhe blogerët duhet të kuptojnë se fëmijëve mund t’ju mësohet një ide e gabuar si të bëhen të fiksuar me pamjen duke u kuruar në detaje që në moshsë shumë të vogël. Ekspertët thonë se mendimi që fëmijët janë shumë të vegjël dhe nuk do ta marrin këtë zakon është i gabuar.
Nga ana tjetër disa janë të mendimit se fëmijët janë të gjithë shumë të bukur dhe është e tepërt të përpiqesh t’i zbukurosh përmes rrobave shumë të shtrenjta apo të modës së fundit.
Po ju nëna të dashura ç’mendim keni lidhur me këtë temë? Ju duket abuzim përdorimi i fëmijëve si imazh në rrjetet sociale? Ju vetë a postoni shumë foto të tyre? Nëse po, a bëni thjesht foto spontane, apo i angazhoni fëmijët me veshje, pozicione etj?
Lexo edhe: Kujdes! Keto fotografi te femijes nuk duhet te postohen ne rrjetet sociale
Për të lënë një koment ju duhet të jeni regjistruar Identifikohu