Ndryshimet në shtatzani nuk kanë lidhje vetëm me fizikun e gruas por edhe me anën psikologjike të saj. Në këtë periudhë të gjitha emocionet e gruas ndryshojnë, duke e bërë atë të përjetojë emocione pozitive apo negative brenda një momenti.

Përse është e rëndësishme që nervozizmi të mbahet nën kontroll?

Stresi dhe ankthi nuk duhet të nënvlerësohen pasi ndikojnë në mirëqënien e nënës dhe fëmijës.

Nervozizmi mund të shfaqet në mënyra të ndryshme, por fëmija atë e ndjen bashkë me nënën. Stresin në shtatzani e shkakton rritja e hormonit përgjegjës, pra kortizolit dhe kjo është diçka që ka efekte negative tek shtatzania.

Një nënë që kalon shumë stres në shtatzani është më tepër e prirur të ketë një lindje të parakohshme, ka më shumë mundësi të vuajë nga pre-eklampsia, por mbi të gjitha ka edhe shumë mundësi të sjellë në jetë një fëmijë me probleme në sjellje, hiperaktiv si edhe me shumë probleme në autokontroll. Pra fëmija nuk merr nga nëna vetëm elementët e nevojshëm për rritjen dhe zhvillimin e tij, por përjeton edhe të gjitha emocionet.

Këtë gjë e pohon edhe “National center for biotechnology information”, duke theksuar gjithashtu se është tepër e rëndësishme që nëna të jetë sa më e qetë në mënyrë që fëmija të jetë gjithashtu tepër i qetë dhe i përmbajtur. Në këtë aspekt një rol të rëndësishëm luan edhe partneri.