Hipoglicemia është një problem që mund të shfaqet edhe tek bebet dhe i referohemi uljes së nivelit të sheqerit në gjak nën vlerat normale (nën 50 mg).

Tek cilët fëmijë mund të shfaqet hipoglicemia?

Më të prirur janë bebet që:

• Kanë ardhur në jetë nga nënat diabetike duke qënë se glukoza ka dalë nga trupi i tyre nëpërmjet kordonit ombelikal;
• Kanë ardhur në jetë shumë herët ose nuk ka pasur zhvillimin që i takon për javën e shtatzanisë;
• Kanë një peshë shumë të vogël në lindje apo mosfunksionim të mirë të mëlcisë;
• Janë shumë të zhvilluar për javën që kanë lindur, dhe kjo mund të shkaktohet edhe nga diabeti i nënës.

Gjithashtu shfaqjen e këtij problemi e favorizon edhe:

• Kequshqyerja e nënës në shtatzani;
• Sasia e madhe e insulinës së prodhuar nga nëna diabetike;
• Disa probleme në gjak. Kur nëna dhe fëmija nuk kanë përputhshmëri në tipin e gjakut;
• Defektet në lindje dhe problemet metabolike;
• Asfiksia në momentin e lindjes;
• Stresi i shkaktuar nga temperaturat e ulëta, pra kur fëmija ka shumë ftohtë;
• Infeksione të ndryshme;
• Sëmundje të mëlcisë.

Cilat janë simptomat që fëmija paraqet?

Ato mund të mos jenë të njëjta tek fëmijë të ndryshëm, megjithatë ndër më të shpeshtat do të përmendnim:

• Dridhjet;
• Cianoza (lëkura merr ngjyrë blu);
• Apnea (ndalimi i frymëmarrjes);
• Hipotermi (temperaturë e ulët e trupit);
• Muskujt janë shumë të dobët (nuk kanë tonifikimin e duhur);
• Ushqyerja është e dobët;
• Letargji etj.

Si veprohet në këtë rast?

Pasi ka diagnostikuar problemin me anën e një analize gjaku, mjeku mund të bëjë trajtimin e fëmijës duke i dhënë glukozë nëpërmjet mënyrës që ai e konsideron si më të përshtatshmen për fëmijën, duke përfshirë edhe mundësinë e futjes së glukozës në ujin e qumështit të formulës. Nga ky moment fëmija mbahet nën vëzhgim të vazhdueshëm.