E dini se lakra e bardhë është një prej perimeve më të shëndetshme për njeriun? Ajo ka shumë rëndësi në lidhje me parandalimin e të dyja tipeve të diabetit dhe këtë e dëshmon një studim i kryer në Danimarkë në rreth 57000 të rritur. Gjithashtu duke qënë se lakra përmban rreth 15 tipe fenolesh të cilët janë elementë që i japin asaj vlerat e një antioksidanti të fuqishëm. Si pasojë e kësaj shumë studime dëshmojnë se lakra e bardhë ka një efekt tepër pozitiv edhe në parandalimin e shumë sëmundjeve kardiovaskulare. Vlera të mëdha ka edhe lakra në ngjyrë lejla.
Nuk duhet të harrojmë pa përmendur edhe efektet pozitive që konsumi i lakrës ka në lidhje me luftimin e inflamacioneve në organizëm, sidomos kur ato janë kronike, dhe gjithashtu ka veti anti-tumorale. Është e pasur me prebiotikë dhe përdorimi i saj mund të vlejë në forcimin e imunitetit si edhe përmirësimin e tretjes. Është shumë e pasur me fibra dhe përmban shumë pak kalori.
Si të gatuajmë lakrën?
Më ka rastisur të provoj disa forma gatimi të lakrës (e kam fjalën për gjellën kryesisht), por ajo që më ka tërhequr më tepër ishte gatimi që një zonjë korçare i bëri dhe unë pata fatin ta provoja. Recetën e keni si më poshtë:
Përbërësit për 4 persona:
- Mish derri;
- 1 qepë mesatare;
- 1 lakër mesatare;
- Piper i kuq;
- Kripë;
- Vaj.
Përgatitja
- Kur e mora këtë recetë nga zonja në fjalë mbaj mend se më theksoi dy gjëra. E para që gjella me lakër duhet gatuar me mish derri, dhe e dyta se duhet zier në zjarr shumë të ulët.
- Fillimisht merrni mishin dhe e hidhni në tenxhere derisa të mos ketë ujë (mund të lëshojë shumë pak si fillim). I hidhni vaj rreth 3-4 lugë gjelle, kripë dhe e skuqni mirë derisa të krijojë një shtresë të fortë.
- Grini qepën dhe e shtoni tek mishi. E kaurdisni pak dhe më pas shtoni lakrën e prerë në copa të mëdha.
- Shtoni piperin e kuq (djegës ose jo sipas dëshirës), dhe e përzieni vazhdimisht derisa lakra të fillojë të zbutet mirë. Në momentin që ajo është zbutur dhe ka nevojë për ujë i shtoni maksimumi një filxhan caji.
- I vendosni kapakun dhe e lini të ziejë në zjarr shumë të ngadaltë duke e kontrolluar vazhdimisht nëse ka nevojë për ujë. Nëse po duhet të shtoni nga pak (1 filxhan kafeje) derisa lakra të ketë zier.
- Kujdes! Në fund lakra duhet të ketë shumë pak lëng dhe të ngelet vetëm me yndyrën. Ajo gjithashtu duhet të ruajë formën e saj dhe jo të zihet aq shumë sa të tretet plotësisht.
- Për më shumë shije dhe nëse e pranoni, mund të shtoni në pjatë edhe spec djegës të kuq!
Ju bëftë mirë dhe na shkruani për recetat që dëshironi në vazhdim!
Lexo edhe:
Lakra kale, vlera edhe ne shtatzani
Foto: Gatime shqiptare
')}
Për të lënë një koment ju duhet të jeni regjistruar Identifikohu