Një lot mund të jetë i mjaftueshëm për të vlerësuar nivelet e glukozës në gjak dhe për të bërë testet e nevojshme për të mbajtur nën kontroll diabetin. Kjo mundësi zbulohet nga një studim i kryer nga Universiteti i Tokios dhe i prezantuar në Kongresin e fundit Evropian të Diabetologjisë (EASD), i cili tregon se si analiza e lotëve bën të mundur monitorimin e niveleve të sheqerit në gjak, pa iu drejtuar testeve invazive.

Nevojiten kontrolle të vazhdueshme

Diabeti është një sëmundje që ka nevojë për kontrolle të vazhdueshme për të parandaluar ndonjë ndërlikim. Prandaj është thelbësore që të mbahen gjithmonë të monitoruara nivelet e glukozës në gjak. Sidoqoftë, metodat e përdorura deri më sot janë invazive. Pikërisht për këtë arsye, studiuesit gjithmonë kanë kërkuar alternativa jo-invazive, por asnjëra deri më tani nuk ka rezultuar e përshtatshme për të zënë vendin e kontrollit të gjakut.

Pika e kthesës me anë të lotit

Nga kjo nevojë, studiuesit e universitetit japonez kanë filluar një rrugë për të vlerësuar mundësinë që matja e sheqerit në gjak të kalojë nga një lot i thjeshtë, duke eleminuar kështu nevojën për të marrë mostra të gjakut. Studimet e mëparshme kishin treguar tashmë se si nivelet e glukozës në lot korrespondonin mjaft saktë me vlerat e gjetura në gjak.

Studiuesit ekzaminuan biomarkerët e diabetit që përmbahen në lot. Duke përqendruar analizat në nivelet e glikalbuminës, ishte e mundur të krahasoheshin rezultatet e analizave të marra nga gjaku me ato të marra nga analiza e një loti. Në fakt, glikalbumina pasqyron nivelet mesatare të glukozës në gjak në dy javë para mbledhjes. Studimi mblodhi lot dhe gjak nga 100 subjekte diabetikë, duke zbuluar një korrelacion të rëndësishëm midis niveleve të glikalbuminës së lotëve dhe atyre të gjakut.

Një e ardhme më pak invazive

Për më tepër, kjo marrëveshje gjendet pa ndonjë ndryshim me parametra të ndryshëm të moshës, seksit, funksionit renal dhe mbipeshës. Siç u theksua nga Dr. Masakazu Aihara, nënshkruesi i parë i studimit, këto rezultate tregojnë se një lot mund të jetë i mjaftueshëm për ta bërë monitorimin e diabetit më pak invaziv. Natyrisht, do të nevojiten informacione të mëtejshme dhe pajisje ad hoc, por e ardhmja e monitorimit të diabetit me të vërtetë duket të jetë më pak invazive.

Lexo edhe: Mos u kufizoni në ushqyerje, mjafton një masë për të trajtuar diabetin