Një pjesë e vogël e mikrobeve që shkaktojnë diarre mund të mjekohen, por në shumicën e rasteve nuk është i nevojshëm mjekimi. Kur diarreja është me gjak dhe mukus, ka më shumë mundësi të trajtohet me mjekim. Në këtë rast duhet përcaktuar patjetër lloji i mikrobit duke u bërë analiza e feçes. Trajtimi planifikohet sipas përfundimit të analizave. Kur diarreja është pa gjak, pa mukus dhe e ujshme, ka mundësi të lartë që të jetë shkaktuar nga lloje mikrobesh që s’kanë nevojë për trajtim. Në këtë rast përdorimi i medikamentit, antibiotikut nuk është i dobishëm. Antibiotiku mund të dëmtojë zorrën dhe të shtojë diarrenë, prandaj nuk duhet përdorur në asnjë mënyrë.
Diarreja zgjat zakonisht 7-10 ditë, por mund të zgjasë edhe më shumë ose më pak. Duhet të dini se shumica e diarreve rikuperojnë vetë. Gjëja më e rëndësishme është zëvendësimi i lëngjeve të humbura. Gjatë diarresë nuk sëmuret vetëm zorra, por edhe stomaku. Kur sëmuret stomaku fëmija vjell. Vjellja nuk është pengesë për pirjen e ujit apo ngrënien e ushqimit, por pacienti me të vjella dhe diarre duhet ushqyer pak dhe shpesh. Fëmija me diarre ka etje për ujë dhe kërkon të pijë shumë. Meqë stomaku është i ndjeshëm, pacienti mund të vjellë menjëherë pas pirjes së ujit, prandaj uji duhet të pihet nga pak.
Mikrobet dëmtojnë murin e zorrëve prandaj asnjë ushqim nuk e ndalon diarrenë. Gjatë ecurisë së diarresë, përthithja e ushqimeve nga zorra vazhdon, prandaj që të mos prishet dieta duhet të vazhdohet me ushqyerje normale, pa ndryshuar llojin e ushqimit të meparshëm. Por në diarre ashtu sikurse në çdo sëmundje tjetër ka mungesë oreksi. Fëmija nuk duhet të hajë i sforcuar, sepse kjo mund t’i shkaktojë të vjella.
Fëmija ka diarre, po tani
Edhe pse zakonisht shfaqet gjatë verës, ajo mund të ndodhë edhe në muajt e tjerë të vitit. Është një nga sëmundjet më të shpeshta të fëmijërisë, si edhe një nga sëmundjet që kërkon më tepër hospitalizimin e pacientit.
Nga se shkaktohet diarreja?
Diarreja shkaktohet nga mikrobet që hyjnë në trup. Mikrobet që shkaktojnë diarre ndodhen në ujë, ushqime dhe të duart e pacientit. Kur nuk tregohet kujdes ndaj rregullave të pastërtisë, këto mikrobe kalojnë në zorrë dhe shkaktojnë sëmundje. Mikrobi i ndodhur në zorrë dëmton murin e zorrës, ul thithshmërinë e zorrës dhe si pasojë rrit sasinë e lëngjeve në të. Jashtëqitja bëhet e butë nga lëngu i tepërt, hollohet dhe del në formë uji.
Si parandalohet diarreja?
Diarreja përhapet nga uji dhe ushqimet me mikrobe, prandaj duhet të kemi kujdes ndaj rregullave të pastërtisë së ushqyerjes. Qumështi i nënës është steril, domethënë pa mikrobe, dhe në të ka përbërës mbrojtës ndaj diarresë. Qumështi i trashë dhe i verdhë që vjen menjëherë pas lindjes ka shumë përbërës mbrojtës, prandaj bebi duhet ushqyer vetëm me qumësht gjiri. Bebi që ushqehet vetëm me qumësht gjiri, nëse arrin peshën e duhur çdo muaj, nuk ka nevojë as për ujë edhe në kohë të nxehta. Kur bebi nuk ka nevojë për ujë, dhënia e tij krijon mundësinë e dhënies së mikrobeve dhe si pasojë dhe shkaktimin e sëmundjeve, prandaj rregulli kryesor i mbrojtjes së bebit larg nga diarreja është të ushqyerit vetëm me qumësht gjiri dhe mundësisht për një kohë sa më të gjatë.
Pastrimi i ujit të pijshëm është shumë i rëndësishëm. Mënyra më e mirë e pastrimit të ujit nga mikrobet është zierja. Uji i zier që mbetet në çajnik është mirë të hidhet në një enë tjetër dhe të përdoret për bebet. Uji i mbyllur në shishe mund të mos zihet nëse i përket një marke të sigurt dhe të mirë kontrolluar.
Çfarë ndodh kur ka diarre?
Jashtëqitja e bebes me diarre është e ujshme, e shpeshtë, prandaj trupi humbet ujë. Zakonisht kur nuk është sëmurë trupi humbet ujë me jashtëqitje, urinim, djersë dhe frymëmarrje, por e ploteson atë duke e marrë si ujë të pijshëm, lëngje apo ushqim. Të tjerë elementë që humbasin me diarrenë janë edhe kripërat, por këto zëvendësohen duke u ushqyer normalisht.