Çdo pikë e qumështit të gjirit është e vlefshme, si mundohet ta ruajë kjo nënë

Të tjerët ndoshta nuk e kuptojnë, por për një nënë që e shtrydh qumështin e gjirit me pompë, kjo çështje përbën një shqetësim shumë të madh.

Kur mundohesh aq shumë për të siguruar prodhimin e qumështit të gjirit, nuk dëshiron të humbasësh asnjë pikë prej tij dhe Chrissy Teigen e di këtë gjë shumë mirë.

Nëna e dy fëmijëve postoi një video në mediat sociale të mërkurën duke treguar përpjekjet e saj për të ruajtur qumështin e gjirit, i cili i kishte rënë pak në tavolinë. Ajo përdori vegla të ndryshme dhe një shiringë që të përpiqej të merrte qumështin përsëri për ta vendosur në shishe.

“Kam derdhur pak nga qumështi që po shtrydh me pompë, dhe kjo është çështja më e rëndësishme në shtëpinë tonë. Do përpiqem ta ruaj, mjafton edhe një ose dy pika”, – thotë ajo ndërsa thith qumështin me shiringë.

Ajo është duke ushqyer me gji fëmijën e saj të dytë dhe ka qenë shumë e hapur për të treguar rreth gjidhënies dhe faktit që përdor pompën për të ruajtur qumështin, sepse i duhet të punojë dhe nuk është gjithmonë e pranishme në çdo moment për fëmijën.

Ajo është gjithashtu e hapur për faktin se furnizimi me qumësht ka qenë gjithmonë një problem për të, me të dy fëmijët.

Kam kuptuar se sa më shumë të shtrydhësh qumështin me pompë, aq më shumë qumësht do të prodhojë gjiri. Unë nuk prodhoja shumë qumësht dhe kjo ishte zhgënjyese. Dhe sa më e shqetësuar të isha, aq më pak qumësht prodhoja.

Këtë e mbështesin edhe shumë studime, që lidhin stresin me pakësimin e qumështit të gjirit. Prandaj për shumë nëna çdo pikë e qumështit të tyre është e vlefshme.