Sezoni i festave të fundvitit është një periudhë e mbushur me emocione për fëmijët. Një nga traditat shekullore të kësaj periudhe është dhe ardhja e babagjyshit. Por jo çdo fëmijë mund të besojë tek kjo traditë. Shumica e fëmijëve besojnë tek babagjyshi, por ndërsa rriten ata mësojnë fakte të reja rreth kësaj figure imagjinare dhe gradualisht fillojnë të kuptojnë të vërtetën se babagjyshi nuk ekziston, se dhuratat i ka sjellë mami dhe babi ose të tjerë të afërm.

Kur fëmijët janë gati ta pranojnë dhe ta kuptojnë këtë të vërtetë?

Fëmijëria është koha e zbulimit dhe eksplorimit, është koha kur fëmijët mësojnë dhe nxënë çdo ditë. Prindërit duhet t’ua tregojnë fëmijëve të vërtetën për figurën e babagjyshit kur ata japin shenja se janë të gatshëm për të dëgjuar këtë të vërtetë. Kur fëmijët janë gati? Kjo është një pyetje tjetër që kërkon përgjigje. Sinjalet nga fëmijët kanë më shumë gjasa të vijnë në formën e pyetjeve të drejtpërdrejta rreth figurës së babagjyshit, ekzistencës së tij, udhëtimeve të tij nëpër botë e të tjera si këto. Ata kërkojnë të marrin shpjegime lidhur me mospërputhjet që ata kanë konstatuar për babagjyshin, ose bëjnë komente delikate rreth kësaj çështje. Fëmijët mund të tregojnë më pak interes se më parë për babagjyshin, për letrën që duhet t’i shkruajnë atij ose mund të flasin më pak për të. Të gjitha këto tregojnë se fëmijët kanë “fakte” për të mos besuar më tek figura e babagjyshit.

Por Babagjyshi ka mbetur si një simbol i festimit të Krishtlindjeve dhe Vitit të Ri. Ai ka mbetur një traditë e pushimeve të festave, si një nga mrekullitë e imagjinatës dhe fantazisë fëmijërore, ndaj shumë prindër nuk duan ta prishin këtë traditë dhe vazhdojnë t’u thonë fëmijëve se babagjyshi do të vijë edhe këtë vit dhe do t’u sjellë dhurata. Është pothuajse e pamundur të shmanget imazhi i babagjyshit në periudhën e fund vitit. Ai është kudo, në reklamat televizive, në posterat e afishuar, në personazhet e filmave, në vitrinat e dyqaneve, në ambalazhet dhe paketimet e ushqimeve, në dekorin që mbulon qytetin, në kukullat dhe lodrat simbol të këtyre festave. Dhe natyrisht që fëmijët do të pyesin se kush është babagjyshi, ku jeton dhe shumë pyetje të tjera rreth tij.

Si ta shpjegojmë figurën e babagjyshit tek fëmija?

 

Prindërit duhet të flasin për babagjyshin vetëm si një pjesë tjetër zbavitëse dhe argëtuese e Krishtlindjeve dhe Vitit të Ri, për dekorimet, kartolinat, dhuratat, ushqimet, pa e tepruar duke mbushur gjithë kohën me histori rreth këtij personazhi. Prindërit duhet të mos thonë gjëra që duken si të pavërteta dhe të sajuara. Fëmijët duan të besojnë tek ekzistenca e babagjyshit por përsëri ata bëjnë shumë pyetje, një pjesë e të cilave mund t’i vendosë prindërit në situata të vështira. Prindërit mund të thonë se nuk e dinë këtë apo atë pyetje.

Të besuarit në anën magjike e jetës, është ndoshta pjesë e fëmijërisë dhe e karakteristikave që shoqërojnë këtë fazë të zhvillimit të fëmijës. Shpesh të besuarit tek ekzistenca e babagjyshit është një mënyrë e mrekullueshme për të nxitur imagjinatën dhe fantazinë e fëmijëve deri në një moshë të caktuar. Ndonjëherë legjenda e babagjyshit shikohet si një lojë e veçantë që njerëzit luajnë në kohën e Krishtlindjeve dhe Vitit të Ri.

Vendoseni ju nëse fëmijët tuaj dhe ju bashkë me ta do të jeni lojtarë të kësaj loje apo jo…

Lexo edhe:

Disa kuriozitete rreth pemes se Vitit te Ri

 

')}