Javën e kaluar, në rubrikën Koha të Bisedojme trajtuam temën “A duhet t’i bëjmë publike të gjitha fotot e fëmijëve tanë të vegjël në rrjetet sociale? Si duhet të veprojmë? ”
Pjesa më e madhe e mendimeve të nënave të faqes sonë ishin kundër publikimit të fotove të fëmijëve, me argumentin se ata duhet ta vendosin vetë një gjë të tillë në një moshë më të rritur dhe prindërit nuk kanë të drejtë të abuzojnë me privatësinë e tyre.
Të pakta ishin ato komente kur nënat ishin tërësisht dakord me publikimin e fotove, pasi ruajtja e privatësisë “duhet” për personazhet publikë, ndërsa për personat e thjeshtë që i publikojnë fotot vetëm për familjarët e miqtë e afërt nuk ka asgjë të keqe.
Kishte dhe një tjetër kategori komentesh, të nënave të cilat pohonin se nuk ju dukej e drejtë të postonin foto të fëmijëve, e megjithatë e bënin diçka të tillë nga dëshira e madhe dhe dashuria prindërore për të ndarë me miqtë momentet më të bukura të fëmijëve.
Në fakt, kjo temë diskutohet gjerësisht edhe në botë, madje në rang qeverish e parlamentesh. Për shembull në Itali kjo çështje është diskutuar edhe në parlament. Ende nuk kanë një përgjigje të saktë, definitive dhe gjithçka ngelet në dorën e prindërve.
Në disa vende të botës, postimi i fotove të fëmijës në rrjete sociale me detaje të shkollës ku shkon, kopshtit, çerdhes, oraret, vendet ku kalon kohën e lirë etj, përbën rrezik të madh për sigurinë e fëmijës, pasi atje funskionojnë grupe kriminale që merren me trafikim.
Në vendin tonë ky rrezik nuk është i përhapur, megjithatë është gjithmonë mirë të tregohemi të kujdesshëm, sidomos kur bëhet fjalë për fëmijët, pasi janë prindërit përgjegjës për sigurinë e tyre.
Nëse postoni apo jo foto në rrjetet sociale, mbetet në dorën tuaj, megjithatë duhet të keni kujdes që fotot të mos dëmtojnë në ansjë lloj mënyre fëmijën.
Në një material të mëparshëm ne kemi listuar 8 lloje të fotografive që nuk duhen postuar asnjëherë.
')}
Për të lënë një koment ju duhet të jeni regjistruar Identifikohu