Gruaja shtatëzanë është e ndërgjegjshme për rëndësinë e një ushqyerje të mirë gjatë periudhës së shtatëzanisë. Diçka e tillë mundëson jo vetëm një rritje dhe zhvillim të mirë të fetusit, por edhe i jep gruas energjitë e duhura duke evituar një rritje shumë të madhe të peshës. Megjithatë, pavarësisht kësaj edhe në ditët e sotme gratë shtatëzana vazhdojnë të gabojnë në mënyrën e të ushqyerit.  Cila është ushqyerja e duhur?

Dieta më e mirë është ajo mesdhetare

Një ushqyerje e mirë është e rëndësishme jo vetëm për shëndetin e nënës, por edhe për parandalimin e defekteve tek fetusi. Është vërtetuar se ndjekja e një diete mesdhetare, do të ndihmojë në mbrojtjen e fetusit nga shfaqja e disa defekteve, si për shembull spina bifida. Gruaja duhet të konsumojë shumë fruta, perime, peshk, thjerrëza si edhe vaj ulliri ekstra të virgjër.

Sasi jo të mira të hekurit dhe acidit folik

Gruaja shtatëzanë duhet të dijë se dy nga substancat më të rëndësishme që duhet të merren gjatë shtatëzanisë janë hekuri dhe acidi folik. Diçka e tillë mund të ketë pasoja serioze si për shembull lodhje, lindje të parakohshme, peshë e vogël e fëmijës në momentin e lindjes, deficit në nivelin neurologjik etj. Nëse gruaja do të ushqehet në mënyrë të shëndetshme gjatë shtatëzanisë do të jetë në gjendje të parandalojë ndonjë vonesë në zhvillimin e fëmijës, shkëputjen e placentës si edhe lindjen e parakohshme. Gjithashtu kjo do të ndikojë pozitivisht edhe në parandalimin e defekteve në tubin neural të fëmijës.

Si duhet të veprojmë me marrjen e vitaminave?

Është shumë e rëndësishme që gruaja të marrë të gjithë elementët e nevojshëm për ecurinë e mirë të shtatëzanisë si edhe rritjen dhe zhvillimin e fëmijës, nevoja për të cilat gjatë shtatëzanisë rritet ndjeshëm. Duke vlerësuar gjendjen e gruas, mjeku do të përshkruajë marrjen e vitaminave suplementare. Marrja e tyre nuk duhet të bëhet me inisiativën vetjake, pra pa marrë më parë edhe mendimin e mjekut, kjo pasi gruaja shtatëzanë nuk mund ta dijë se për cilat elemente ka nevojë organizmi i saj pa bërë më parë analizat e nevojshme.