Viti 2018 ka qenë ndër më të bukurit për këngëtaren Tuna. Pasi përjetoi emocionin më të fortë  në vitin 2017, atë të të bërit nënë, viti që lamë pas rezervoi të tjera ndjesi magjike për të. Fjalët e para të Tianit, ditëlindja e tij e parë, hapat e parë e shumë të tjera, Tuna i ka rrëfyer në emisionin Mirage.

Ajo thotë se të gjitha herët e para të djalit të saj Tianit i kanë shënuar në një fletore në shtëpi. Fjala e tij e parë ka qenë gjithashtu  shumë emocionuese, tregon Tuna, por nuk ka qenë as mami as babi. Tiani për herë të parë ka thënë kali, sepse është kafsha e tij e preferuar. E megjithatë, ai ende nuk e thërret mami këngëtaren, por e thërret në emer : Tuna.

Pavarësisht këtyre momenteve kaq të bukura, Tuna ka folur edhe për disa momente të vështira të mëmësisë. Këngëtarja me bashkëshortin e djalin jeton në Prishtinë,  ndërsa familja e saj në Shkup. Këtë distancë Tuna e ka ndjerë sidomos në javët e para të ardhjes së Tianit në jetë. Ajo tregon se dy javë pas lindjes është kthyer në Prishtintë dhe ato kanë qenë momente krizash të forta pasi po përballej me një jetë krejtësisht të re pa praninë e familjes. Megjithatë, Tuna tregon se është me fat që ka një partner si Patrisi i cili e ka mbështetur në gjithçka. Madje, këngëtarja rrëfen se djalin e saj e ka larë për herë të parë i ati dhe jo ajo.