Një histori që tregon edhe njëherë se nëna është një grusht vuajtjesh dhe simbol i gjallë i sakrificës, por kësaj here ajo nuk ia doli të shpëtonte fëmijën e saj.

Ngjarja tragjike ndodhi dje në një fshat të Pogradecit, ku një e mitur u mbyt së bashku me nënën që po përpiqej ta shpëtonte.

Nënë e bijjë janë mbytur në një gropë uji që shërbente për vaditjen e tokave. Fillimisht ka qenë vajza 10-vjeçare e cila ka rrëshqitur në gropën 2-3 metra të thellë dhe më pas nëna në përpjekje për ta shpëtuar, nuk e ka menduar dy herë por është futur dhe kjo ka sjellë fatin tragjik.

Ato janë gjetur nga vajza pak më e madhe e 35-vjeçares, e cila tashmë ka lënë tre fëmijë të tjerë jetim.

Banorët e fshatit kanë treguar se bashkëshorti i gruas kishte shkuar në emigrim, ndërsa Lirie Mazelli kujdesej për tokat. Në kushte të vështira ekonomike, gruaja punonte në shtëpi dhe ara ndërsa bashkëshorti shkonte nga tre muaj, herë në Greqi e herë në Maqedoni.