Një grua që vuante nga kanceri i avancuar i gjirit, i cili ishte përhapur rreth trupit të saj është pastruar plotësisht nga sëmundja nga një terapi inovative që shfrytëzon fuqinë e sistemit të saj imunitar për të luftuar tumoret.
Është hera e parë që një paciente me kancer gjiri në fazë të avancuar është trajtuar me sukses nga një formë e imunoterapisë që përdor qelizat imune të pacientit për të gjetur dhe shkatërruar qelizat e kancerit që janë formuar në trup.
Judy Perkins, një inxhiniere nga Florida, ishte 49 vjeçe kur u përzgjodh për terapinë radikale të re, pasi disa raunde të kimioterapisë nuk arritën të mposhtnin tumorin në gjoksin e saj të djathtë dhe ai po përhapej në mëlçi dhe zona të tjera. Në atë kohë, mjekët i kishin thënë se kishte vetëm tre vjet për të jetuar.
“Gjendja ime u përkeqësua shumë në fund. Përpiqesha të mos lëvizja fare për të shmangur dhimbjet që më pushtonin anën e djathtë. Kisha hequr dorë nga lufta”, tha Perkins.
Mjekët që e trajtuan thanë se përgjigja e trupit të saj ndaj terapisë ishte shumë e mirë dhe efiçente.
Suksesi i jashtëzakonshëm ka rritur shpresat se terapia do të funksionojë në pacientë të tjerë me kancer gjiri të avancuar dhe të tjerë lloje kanceri që janë të vështirë për t’u trajtuar, si kanceri ovarian dhe prostata.
Hulumtuesit tani po planifikojnë studime klinike në shkallë të plotë për të vlerësuar se sa efektiv mund të jetë trajtimi.
“Tani jemi në kulmin e një revolucioni të madh në përfundim të realizimit të qëllimit për të qenë në gjendje të mposhtim kancerin nëpërmjet imunoterapisë”, tha Radvanyi, një nga mjekët.
Por ekspertët paralajmërojnë se trajtimi është provuar vetëm tek një grua dhe se studimet klinike nevojiten për të parë se sa efektive mund të jetë terapia në pacientë të tjerë me kancer.
Për të kryer trajtimin, mjekët fillimisht morën pjesë të vogla të indeve nga tumoret e Perkins dhe studiuan ADN-në për të gjetur mutacione specifike për kancerin e saj.
Mjekët gjithashtu nxorën qelizat imune të njohura si limfocite infiltruese të tumorit. Këto janë qelizat nga sistemi imunitar i pacientes që pushtuan tumorin në përpjekje për ta vrarë atë, por që dështuan duke qenë shumë pak në numër.
Pas rritjes në miliarda të këtyre qelizave imunologjike në laborator, hulumtuesit i shqyrtuan ato për të gjetur se cilat prej tyre do të gjenin më efektivisht dhe do të shkatërronin qelizat e kancerit.
Mjekët e trajtuan Perkins duke injektuar 80 miliardë qeliza imune të përzgjedhura me kujdes në trupin e saj. Testet pas 42 javëve treguan se Perkins ishte plotësisht e shëruar nga kanceri.
“Është ndjesi e mrekullueshme dhe jam më shumë se e habitur që kam dy vjet që jam shëruar nga kanceri”,- tha Perkins.
“Kisha dhënë dorëheqjen nga beteja dhe po planifikoja të vdisja. Kam pasur një listë të gjërave që duhej të bëja para vdekjes, por tani i jam rikthyer jetës normale”.
Por mjekët theksojnë se terapia është komplekse dhe e shtrenjtë dhe më e rëndësishmja, kërkon që mjekët të gjejnë qeliza të mjaftueshme infiltruese imunale në tumorin e pacientit për ta bërë trajtimin efektiv.
Lexo edhe: Si ndikon bulmeti ne kancerin e gjirit?
Sorry, there are no polls available at the moment.')}
Për të lënë një koment ju duhet të jeni regjistruar Identifikohu