Kohët e fundit vihet re një rritje e theksuar e kujdesit mjekësor në shtatzani, dhe duhet të dini se kjo është shumë e rëndësishme për të mbajtur nën kontroll shëndetin e nënës dhe fëmijës. Megjithatë, jo gjithçka i referohet vetëm shtatzanisë, e rëndësishme është edhe lindja. Gruaja duhet të ketë një mjek të besuar i cili do të mund ta udhëzojë atë në lidhje me atë çfarë duhet të bëjë dhe atë që do të jetë më e mira në lidhje ecurinë e shtatzanisë së saj.

Të gjitha gratë janë në gjendje të lindin vetë

Pse mendoni se nuk jeni në gjendje të sillni në jetë një fëmijë në mënyrë natyrale? Nëse ju gëzoni shëndet të mirë, fëmija po ashtu, keni një legen në përmasa normale dhe nuk keni asnjë rrezik për komplikacion duhet të pranoni të lindni në mënyrë natyrale. Nuk ka asgjë për të cilën duhet të keni frikë. Mamia do t’ju udhëzojë, do t’ju tregojë si të veproni kur keni kontraksionet e kështu me rradhë.

Të gjitha gratë janë në gjendje të lindin në mënyrë natyrale, dhe e dini përse? Sepse fiziku i një gruaje është ndërtuar në mënyrë të tillë që të jetë në gjendje të mbajë një shtatzani si edhe të bëjë një lindje natyrale.

Disa përjashtime…

Në disa raste operacioni është i domosdoshëm dhe ju duhet të mos insistoni. Kjo gjë zakonisht ndodh kur ju ose fëmija ka një rrezik (patologji gjenetike të nënës ose fëmijës, keqformime fizike, kushte të veçanta të nënës dhe fëmijës etj). Por nëse tek ju nuk ekziston asgjë e tillë atëherë nuk keni arsye pse të mendoni se nuk do të mund të bëni lindje natyrale.