Lindja në ujë është një praktikë që zbatohet për të lehtësuar dhimbjet e lindjes, e cila mundësohet nga shumë spitale me shërbimetë avancuara, por që në shumë vende të botës gratë e praktikojnë edhe në shtëpi nëpërmjet pishinave prej gome.

Si funksionon lindja në ujë?

Kushti i parë duhet të jetë shtatëzania fiziologjike, pra pa probleme. Më pas, me fillimin e proçesit të lindjes gruaja shoqërohet drejt një pishine të posaçme me ujë të ngrohtë, kryesisht pasi gruaja është hapur 5 cm, por mund të futet edhe më parë. Mjekët janë gjithmonë pranë gruas për të kontrolluar rrahjet e zemrës së gruas dhe fëmijës si edhe temperaturën e ujit. Gjatë kësaj kohe mjeku mund t’i kërkojë gruas të dalë disa herë për të rihyrë për pak. Por edhe gruaja ka të drejtë të dalë nga pishina kur të dojë, qoftë edhe për të vazhduar lindjen jashtë saj. Frika e shumë nënave është nëse fëmija do të jetë në gjendje të marrë frymë sapo të dalë në ujë, por nuk duhet të shqetësoheni pasi fëmija e zhvillon refleksin e frymëmarrjes sapo del nga uji.

Cilat janë përparësitë e lindjes në ujë?

Të qëndruarit në ujë do të ketë ndikime pozitive përsa i përket qetësimit të muskujve si edhe rregullimit të frymëmarrjes. Gjithashtu ajo mund të marrë pozicione të ndryshme pa ndier dhimbjen që mund të ndiente jashtë ujit. Pesha e trupit mbahet edhe nga uji dhe kështu ajo do të ndihet më pak e lodhur. Përsa i përket fëmijës ai do të jetë shumë mirë edhe pas një lindje në ujë.

Po epidurali?

Edhe në këtë rast gruaja mund të aplikojë këtë lloj anestezie.