Shumë prej nesh na ndodh shpesh në stinën e verës që të kemi mungesë oreksi për shkak të vapës dhe sidomos për gatimet tradicionale e gjellët e ngrohta. Ndonjëherë duket se e vetmja gjë që dëshirojmë të konsumojmë këtë periudhë janë sallatat apo pjatat e ftohta, si një mënyrë për t’u freskuar në ditët e nxehta.

Po ju japim një ide për një recetë që mund të shërbejë si pjatë shoqëruese, por shumë mirë mund të jetë edhe pjatë e parë.

Pëbërësit:

një kg speca (të kuq ose jeshillë);

gjysmë gote vaj ulliri;

gjysmë gotë uthull balsamike;

1 tufë e vogël majdanoz;

1 thelb hudhër.

Përgatitja:

Pastroni specat nga bishti dhe pjesa e brendshme që përmban farat, lajini dhe siç janë, pa i prerë, pa vaj vendosini në tavë e piqini përreth 30 minuta.

Pastaj hiqini nga furra, vendosini në një qese dhe lërini në frigorifer. Kjo do t’i ndihmojë të zbuten dhe t’i pastroni lëkurën.

Ndërkohë, në mikser hedhim majdanozin, vajin, uthullën dhe hudhrën. I përziejmë të gjitha bashkë derisa të formohet një salcë.

Pas disa minutash nxjerrim specat nga frigoriferi dhe do të vërejmë se lëkura do të hiqet me shumë lehtësi dhe i copëtojmë me duar në fije të holla. Sipër tyre hedhim salcën e përgatitur. Mund t’i shoqëroni me djathë të bardhë. Ju bëftë mirë!

Lexo edhe: Si te gatuajme speca te mbushur?