Ju si prindër keni për detyrë të kujdeseni edhe për sigurinë e fëmijës ndërsa është duke luajtur në park, dalë nga shkolla,  luajtur jashtë shtëpisë, kjo pasi në një moment pranë tij mund të afrohet një person i panjohur i cili mund të ketë qëllime të këqija.

Fëmijët dhe karamelet

Një nga shprehet tipike që nënat i thonë fëmijës është “mos prano karamele nga askush që nuk e njeh”! Po sikur të mos kishte të bënte vetëm me karamelet? Në të gjithë botën është bërë virale një video që tregon një burrë me një qenush në dorë, i cili me aprovimin paraprak të nënës i afrohet fëmijëve duke i ftuar ta ndjekin për të parë edhe më shumë qenusha të bukur. Të gjithë e kanë ndjekur nga pas, e madje edhe ata në moshë të rritur! Ky eksperiment tregon sa të rrezikuar janë fëmijët çdo ditë nga maniakët apo personat që përdorin të miturit për qëllime të ndryshme.

Si duhet të sillen prindërit?

Detyra juaj është t’i përgatisni ata për të refuzuar ftesat që mund t’ju vijnë nga personat e panjohur dhe konkretisht mund ta bëni këtë duke:

• Në vend që të mësoni fëmijët të mos i flasin të panjohurve, duhet t’i mësoni t’ju përfshjnë edhe juve në bisedën me të. Pra në çdo rast të shprehin dëshirën dhe njëkohësisht nevojën për t’ju marrë lejë edhe ju në lidhje me atë që ai person i kërkon.
• Ti mësoni fëmijës se i panjohuri nuk duhet të bëhet pjesë e bisedave të tij, apo nuk duhet të ndiqet nga pas në çdo rast, jo vetëm në rastin e karameleve.
• Fëmija duhet të mësohet të luajë në grup, në këtë mënyrë ata do të jenë më të përgjegjshëm për njëri-tjetrin dhe tundimi për të bërë diçka të gabuar do të jetë më i vogël.
• Mos e humbi nga sytë për asnjë moment të voglin tuaj. Sidomos në hapësirat e mëdha.
• E mësoni fëmijën të bërtasë me të madhe nëse e shikon që diçka nuk shkon. Ndonjëherë ajo e bërtitur shpëton jetë.