Babai është në punë për pjesën më të madhe të ditës, mamaja është e zënë me gatimin, punët e shtëpisë dhe pazarin ndërsa fëmijët merren me detyrat e shtëpisë pas shkolle, dhe në fund të ditës të gjithë ndihen shumë të lodhur. Ky skenar është i përbashkët për shumë familje, në të cilat koha që të gjithë pjesëtarët e familjes kalojnë së bashku nuk ekziston. Por të gjitha familjet duhet  të “gjejnë” pak kohë për të qëndruar se bashku pasi kjo është shumë e rëndësishme për fëmijët por gjithashtu i ndihmon edhe prindërit të çlirojnë stresin e mbledhur gjatë ditës.
Këtu janë disa mënyra për të kaluar një kohë cilësore me familjen.

Nata e lojës në familje

Të luash një lojë së bashku me pjesëtarët e familjes mund të shërbejë për shumë aspekte. Së pari është një gëzim i jashtëzakonshëm të shikosh të gjithë anëtarët e familjes të shpenzojnë kohën e tyre duke luajtur së bashku, por të mrekullueshme janë edhe bisedat që zhvillohen, “konfliktet” dhe mendimet e ndryshme kritike të cilat ndihmojnë në përmirësimin e aftësive të gjithsecilit. Gjithashtu me siguri që fëmijët tuaj do të zgjedhin një lojë që ata e pëlqejnë shumë dhe kështu do të mundni të plotësoni preferencat e tyre kryesore, përpara tekave për të mira materiale (sende të ndryshme, lodra) dhe të gjithë do të ndihen më të lumtur.

Udhëtim me familjen

Një udhëtim së bashku e bën familjen më të bashkuar e më të lumtur pasi duke kaluar kohë së bashku, larg shpërqëndimeve që ofron televizori apo interneti, ju do të forconi lidhjet që keni me njëri tjetrin.

Leximi me zë të lartë

Edhe kjo është një mënyrë cilësore për të kaluar kohë me familjen pasi në këtë moment, telefonat dhe televizori do të jenë të fikur, të gjitha bisedat do të referohen mbi librin dhe sigurisht një nga pjesët më të bukura është diskutimi për të zgjedhur librin e radhës.

Darka familjare

Ka shumë familje ku babai punon edhe me orë të zgjatura në mënyrë që mami të qëndrojë në shtëpi për tu kujdesur për fëmijet, dhe kjo gjë nuk e lejon atë të kalojë shumë kohë së bashku me familjen, por një mënyrë e mirë që edhe ai të mos ngelet jashtë aktiviteteve familjare është padyshim darka familjare. Këtij vakti duhet t’i jepet rëndësi e madhe dhe duhet të jetë një moment ku e gjithë familja të ulet e të bisedojë në lidhje me ndodhitë e ditës. Gjatë darkës pjesëtarët e familjes mund të ndajnë shqetësimet apo gjërat e bukura që kanë kaluar duke u lidhur kështu më shumë me njëri tjetrin.

Lexoni dhe:Ardhja ne jete e bebes, si te reduktojme xhelozine e femijes te madh 

')}