Momenti kur një çift mëson se do të bëhet me fëmijë është nga ato momente kur emocionet është vështirë të shprehen me fjalë. Të pashmangshme janë mendimet dhe pikëpyetjet që lindin në mendjen e prindërve: Si do të jetë fëmija? Kujt do t’i ngjajë? A do të lindë i shëndetshëm? A do të jemi ne prindër të mirë për të? dhe shumë pyetje të tjera duke filluar nga pamja e deri tek mendimet për arsimin dhe profesionin që do të zgjedhë fëmija i tyre.

Por deri në momentin kur foshnja të shohë dritën e diellit, e t’i falë nënës lotët e papërmbajtshëm të gëzimit, është një rrugë e gjatë, shpesh jo fort e lehtë brenda trupit të nënës. Aftësia sublime që natyra i ka falur gruas për të mbajtur brenda vetes jetë e më pas për ta sjellë këtë jetë në botë është një bekim.

Por gëzimi i rrugëtimit të bukur 9-mujor, shoqërohet shpesh edhe nga shqetësime, për të cilat është mirë që nënat të kenë infromacion që t’i kalojnë sa më lehtë ditët e pritjes së ëmbël.

Shenjat e para të shtatzanisë dhe më të shpeshtat, të cilat krijojnë shqetësim për nënën janë kryesisht të vjellat. Sado e sikletshme të jetë kjo ndjesi, e ka një të mirë që për nënat është më e rëndësishmja se çdo gjë tjetër. Te vjellat mbrojnë fëmijën tuaj dhe ju mbrojnë ju nga rreziku i abortit. Mjekët specialistë shpjegojnë se të vjellat janë një mekanizëm mbrojtës që organizmi i nënës vendos për të mbrojtur fëmijën nga toksinat dhe patogjenët e pranishëm në ushqim dhe pije, duke rritur shanset për të pasur një shtatzani të mbarë. Megjithatë duhet të tregoni kujdes në mënyrën e të ushqyerit dhe disa nga aktivitetet e përditshme për të minimizuar ndjesinë e përzierjes e të vjellave.

• Duhet të hani ushqim në racione të vogla e të shpeshta

• Hani përpara se t’ju shfaqen turbullimet sepse ushqimi shumë herë i parandalon të vjellat

• Merrni sasinë e nevojshme të lëngjeve

• Përpiquni të zvogëloni stresin

• Vitamina B6 ndihmon lehtësimin e shqetësimeve, ndërsa për çdo medikament tjetër duhet të konsultoheni me mjekun

• Por studimet kanë treguar se një përqindje e vogël e grave shtatzëna kanë shqetësime të një shkalle të rëndë. Në këto raste rekomandohet patjetër konsulta mjekëosre.

Shqetësimi nga të vjellat ka qenë mesazhi më i shpeshtë që kemi marrë në faqen tonë, por megjithatë me pak kujdes, gjithçka bëhet më e lehtë kur mendon se brenda teje rreh një tjetër zemër që së shpejti do të vijë në jetë. Ky mendim e lehtëson vuajtjen e atyre ditëve.

“Te vjellat e pesë-mujorit të parë kanë qenë tmerr për mua, nuk e di as vetë sesi kam mbijetuar, por harrohen të gjitha në momentin kur mora ëngjëllin tim të vogel në krah”, – shprehet një nga nënat që na ndjek.

Një tjetër shqetësim gjatë muajve të shtatzanisë është edhe anemia. Mjekët shprehen se rënia e hemoglobinës ëshët normale në shtatzani dhe shkakton lodhje, marramendje e vështirësi në frymëmarrje. Kjo mund të ndikojë negativisht në furnzimin e fetusit me oksigjen.

Çfarë duhet bërë në rastet e pranisë së anemisë?
• Duhet menduar për rregullimin e regjimit ushqimor duke përfshirë në dietën ushqimore, ushqime të pasura në hekur, vitamina të grupit B sidomos B12, proteina, vitaminë C dhe shtuar acidin folik.

• Konsultë me mjekun për të vlerësuar mundësinë për marrjen e suplementeve me hekur. Nëse pas marrjes së hekurit fillon konstipacioni/kapsllëku, ndërrohet preparati me preparat të një prodhimi tjetër.

Një tjetër problem që e hasin nënat, kryesisht kur është shtatzania e tyre e parë, është ankthi i lidhur me frikën për shëndetin e bebit, sidomos nga rezultati i një ekzaminimi që nuk paraqitet brenda normave mesatare.

Çfarë duhet bërë në rastet e pranisë së ankthit dhe pagjumësisë?

• Në shumicën e rasteve, gratë shtatzënë nuk kanë nevojë për ndonjë trajtim specifik.

• Mund të përdoret qetësues i lehtë me bazë kamomili.

• Ndikim pozitiv ndaj ankthit dhe pagjumësisë, është ndjekja e një kursi të përgatitjes për lindjen e fëmijës.

• Nëse problemet nuk marrin zgjidhje me këshillat e mësipërme, kontakti me një psikolog është i nevojshëm.

• Gjithashtu e rëndësishme është edhe frymëmarrja e thellë si dhe qetësia e krijuar duke u kënaqur me fëmijën e ardhshëm, duke e përkëdhelur atë apo edhe duke i kënduar këngë të lehta.

• Ushqimet që konsumohen, duket të jenë të lehta dhe që treten pa vështirësi. Rekomandohet që të mos shkohet në shtrat menjëherë pas konsumit të ushqimit.

Marrja e frymës dhe ndjeshmëria e rrahjeve të zemrës

Në tremujorin e tretë të shtatzënisë, rritja e uteruesit sjell si pasojë ngritjen e diafragmës duke ushtruar presion në zemër dhe mushkëri. Si rezultat, ndihet vështirësi në frymëmarrje e cila vjen duke u shtuar me afrimin e ditës së lindjes.

Nënat duhet të kenë parasysh:
• Fenomenet janë fiziologjike, prandaj nuk është i nevojshëm asnjë lloj trajtimi.

• Kujdes duhet pasur për të mbajtur peshën nën kontroll.

• Duhen evituar ushqimet e rënda sidomos gjatë paranatës dhe natën.

• Nuk duhet konsumuar pije/lëngje me gaz.

• Rekomandohet, që gjumi të fillojë në pozicion të përshtatshëm.

Megjithatë, ka edhe raste kur disa këshilla të përgjithshme nuk mjaftojnë, pasi nënat mund të kalojnë vështirësi shumë të mëdha e serioze, si rasti i nënës që na ka shkruar në faqen tonë.

“Vështirësia ime me e madhe ishte se mbijetova si unë dhe vajza ime sepse jam operuar 6 muajshe shtatzënë nga ciste e ngatërruara dhe të plasura dhe me këtë ndërhyrje hoqën dhe apendesitin, ndërsa tani kam ëngjëllin tim një vjeçe, e cila ma shton jeten”, – rrëfen eksperiencën e saj një tjetër nënë. Në këto raste nevojitet patjetër konsulta e mjekut, por kur gjithçka kalon dhe nëna mban në krah fëmijën e saj, asgjë nuk mund të ketë më shumë vlerë.

Nga nenat pernenat

')}