Hulumtimi i ri nga OBSH dhe partnerët e saj tregojnë se pandemia COVID-19 po ndikon rëndë në cilësinë e kujdesit që u jepet të sapolindurve të vegjël dhe të sëmurë, duke rezultuar në vuajtje dhe vdekje të panevojshme.

Një studim i botuar në Lancet EclinicalMedicine nënvizon rëndësinë kritike të kontaktit të ngushtë të foshnjave me prindërit pas lindjes, veçanërisht për ata që kanë lindur shumë të vegjël (me peshë të ulët lindje) ose shumë shpejt (të parakohshëm). Sidoqoftë, në shumë vende, nëse konfirmohen ose dyshohen për infeksione COVID-19, foshnjat e porsalindura po ndahen në mënyrë rutinë nga nënat e tyre, duke i  vendosur ato në rrezik më të lartë të vdekjes dhe komplikimeve shëndetësore gjatë gjithë jetës.

Kjo situatë është më e shpeshtë në vendet më të varfra ku ndodh numri më i madh i lindjeve të parakohshme dhe vdekjeve të foshnjave. Sipas raportit, ndërprerjet e kontakteve të ngushta me prindin përkeqësojnë këto rreziqe.

Deri në 125 000 jetë foshnjash mund të shpëtohen nëse praktikohet plotëisht kujdesi “kangur” nga nëna . Për foshnjat e lindur para kohe ose me peshë të ulët, kujdesi “kangu”r (kontakti i hershëm, i zgjatur lëkurë-lëkurë me një prind dhe ushqyerja ekskluzive me gji) është veçanërisht e rëndësishme. Te foshnjat e parakohshëm ose me peshë të ulët, nëse tregohet ky kujdes, rreziku i vdekjeve ulet me 40%, te foshnjat me hipotermi me më shumë se 70% dhe tek foshnjat me infeksione të rënda me 65%.

“Ndërprerjet në shërbimet shëndetësore thelbësore gjatë COVID-19 kanë ndikuar rëndë në cilësinë e kujdesit të ofruar për disa nga foshnjat më të prekshme, dhe kjo përfshin të drejtën e tyre për kontaktin aq të nevojshëm me prindërit,” tha Dr Anshu Banerjee, eksperte e OBSH. “Dekadat e progresit në zvogëlimin e vdekjeve të fëmijëve do të rrezikohen nëse nuk veprojmë tani për të mbrojtur dhe përmirësuar shërbimet cilësore të kujdesit për nënat dhe të sapolindurit dhe për të zgjeruar mbulimin e ndërhyrjeve për të shpëtuar jetën si kujdesi kangur”.

OBSH këshillon që nënat duhet të vazhdojnë të ndajnë një dhomë me foshnjat e tyre që nga lindja dhe të jenë në gjendje të ushqejnë me gji dhe të praktikojnë kontaktin lëkurë me lëkurë – edhe kur dyshohet ose konfirmohet infeksioni COVID-19 – dhe të marrin masa për të siguruar praktikat e duhura të parandalimit të infeksionit .

“Nevojitet shumë më shumë vëmendje për të siguruar që praktikuesit e shëndetit dhe politikëbërësit globalisht janë të vetëdijshëm për nevojën për të mbajtur nënat dhe foshnjat së bashku në këto ditë kritike të hershme, veçanërisht për foshnjat e lindura shumë të vogla ose shumë shpejt” .

Studimet nuk kanë raportuar kryesisht asnjë simptomë ose sëmundje të lehtë nga COVID-19 tek të sapolindurit e infektuar, me rrezik të ulët të vdekjes. Ky studim i ri vlerëson se rreziku që të porsalindurit të marrin COVID-19 do të rezultojë në më pak se 2000 vdekje.

Sidoqoftë, infeksioni gjatë shtatzanisë mund të rezultojë në rritje të rrezikut të lindjes së parakohshme, që do të thotë se është edhe më e rëndësishme të sigurohet kujdesi i duhur për të ndihmuar foshnjat e parakohshme dhe prindërit e tyre gjatë pandemisë COVID-19.

Sipas vlerësimeve më të fundit, 15 milion foshnje lindin para kohe (para 37 javësh) çdo vit dhe 21 milion lindin me peshë të ulët (nën 2.5 kg). Këto foshnje përballen me rreziqe të konsiderueshme shëndetësore, duke përfshirë aftësitë e kufizuara, vonesat në zhvillim dhe infeksionet, ndërsa ndërlikimet e lidhura me lindjen prematurë janë shkaqet kryesore të vdekjes së të porsalindurve dhe fëmijëve nën 5 vjeç.

Lexo edhe: Kontakti lëkurë me lëkurë edhe në kohën e pandemisë Covid 19