Planifikova t’i bëja vogëlushit tim një pure me bizele, por më pas mendova që një pure e thjeshtë me bizele do të kishte mungesa si në shije ashtu edhe në vlera ushqyese, ndaj fillova t’i kombinoja bizelet me pak kungull, e më pas për t’i dhënë një shije ndryshe, më freskuese vendosa t’i shtoj edhe pak mente të cilën i vogëlushi im e ka shumë qejf. Përfundimi ishte i mrekullueshëm, një pure ngjyrë jeshile, e pasur me vlera ushqyese dhe me një shije të freskët. Ju sugjeroj ta provoni!

Përbërësit:

• 2 kunguj mesatar të prerë në copa;
• 1 filxhan me bizele;
• Disa gjethe menteje.

Përgatitja:

1. I piqni në avull apo i zieni kungujt për 5 minuta.
2. Më pas shtoni bizelet dhe i lini së bashku me kungujt edhe për 3 minuta të tjera.
3. I hiqni perimet nga zjarri dhe i lini të ftohen paksa.
4. Më pas me anë të një blenderi bëjini pure perimet duke shtuar edhe gjethet e mentes.
5. Nëse pureja nuk ka dëndësinë e dëshiruar mund të shtoni dhe një lugë uji nga ai me të cilin u zien perimet.

E këshillueshme për bebe + 6 muajsh.

Koha e përgatitjes është 5 minuta.
Koha e gatimit është 8 minuta.
Ruhet në mbajtëse hermetike për 4 ditë në frigorifer ose për 4 muaj në ngrirje.  

Lexoni dhe: Pure me banane, qershi dhe panxhar