Proteinat të domosdoshme për rritjen e fëmijëve, por teprimi i tyre mund të shkaktojë sëmundje

Proteina për fëmijët, po, por sa? Përgjigja vjen nga Shoqëria Italiane e Pediatrisë (Sipps) përmes Nutripiatto, një projekt i edukimit të ushqyerjes për të promovuar ushqim të shëndetshëm për fëmijët e moshës 4 deri në 12 vjeç.

Thelbësore, por në dozën e duhur

Proteinat janë lëndë ushqyese thelbësore në të gjitha moshat, veçanërisht tek fëmijët, për ndërtimin e indeve të reja dhe për riparimin e atyre të dëmtuara. E rëndësishme është të mos tejkaloni sasinë, thotë Sipps, sepse teprica mund të shkaktojë komplikime në veshka, ndryshime të oreksit dhe mbipeshë.Siç është shpjeguar nga Dr. Lisa Mariotti, nutricioniste pediatre marrja e duhur ditore e proteinave për fëmijët është midis:

– 8-12% të energjisë totale ditore nën moshën 3 vjeç (duke rekomanduar që të mos kalojë 15%);

– 12-18% nga 3 vjeç e lart.

Burimet e proteinave

Nga pesë grupet e ushqimeve që i përmbajnë ato, Sipps rekomandon frekuencën e duhur javore të ushqimit:

– mish: 1 porcion i kuq dhe 2 porcione të bardha;

– 1 vezë;

– peshk: 4 racione;

– bishtajore: 4 porcione;

– qumësht dhe nënprodukte të tij rreth 500 ml qumësht (ose 5 kavanoza kos) dhe 2 racione djathë.

Sugjerimi i Dr. Giuseppe Di Mauro, president i Sipps, është që të mos kombinohen proteina me origjinë të ndryshme në të njëjtën vakt, të tilla si një sanduiç me djathë dhe proshutë. Ajo që është e rëndësishme, thekson ai, është të respektohet rotacioni i rekomanduar i burimeve të proteinave, si dhe, natyrisht, një konsum i pjesëve të ekuilibruara.

Proteinat gjenden gjithashtu në disa ushqime me origjinë bimore (të tilla si makaronat, drithërat, tërshëra, frutat e thata, gështenjat), edhe nëse janë në sasi dhe cilësi më të ulët se ato me origjinë shtazore.

A e dini se?

Vetëm proteinat me origjinë shtazore janë të plota me të gjitha aminoacidet (njësitë themelore të proteinave), përfshirë ato thelbësore (9 tek fëmijët, 8 tek të rriturit). Ato quhen thelbësore sepse trupi nuk është në gjendje t’i prodhojë vetë, por duhet t’i marrë me anë të dietës.

Lexo edhe: Brokoli përmban proteina anti tumor, ja fuqia e tij