Si të përgatisim përshesh me gjel deti?

Përbërësit e kulaçit (8-10 persona):

• 1200 gr miell;
• 300 ml kos;
• 1 majë luge sodë buke;
• 1 gjysmë luge kripë.

Përgatitja e kulaçit për përsheshin me gjel deti:

Zëmë brumin duke përzier të gjithë përbërësit, duke u ndihmuar nga 2 gota ujë që i shtojmë pak e nga pak gjatë përzierjes. E lëmë për 30 minuta duke e mbuluar me një pecetë të njomur. E shtrojmë në një tavë që e kemi lyer me pak vaj, e presim pak ne sipërfaqe me majën e thikes si të jetë bakllava, por pa e futur thikën në thellësi. E pjekim në furrën e nxehur 190 gradë, rreth një orë. E nxjerrim nga furra dhe e thërrmojmë sa është ende pa u ftohur, pasi, nëse ftohet, proçedura e thërrmimit bëhet shumë e vështirë. E vendosim në një tepsi të madhe gjatë natës.

Përbërësit që nevojiten për lëngun:

• 1.2 lt lëng pule;
• 1 qepë e kuqe e vogël;
• Te brendshmet e pulës (te ziera);
• 2 lugë nenexhik i thatë (nane, mëndërz);
• Rigon;
• 3-4 lugë vaj ulliri.

Skuqim në një tenxhere me vaj ulliri qepën e grirë imët, derisa ajo të zverdhet. Shtojmë të brendshmet e pulës që i kemi prerë në copa të vogla dhe i skuqim aty. Hedhim lëngun e pulës. Rregullojmë kripën dhe shtojmë erëzat. E lëmë në zjarr deri sa të marrë valë, në mënyrë që të gjithë përbërësit të lidhen me njëri-tjetrin e lëngu të marrë shije. Sapo lëngu të ketë valuar, ia hedhim kulaçit që kemi në tenxhere dhe e përziejmë fort me lugë druri, në mënyrë që çdo copë të njomet me lëngun. E shërbejmë të nxehtë me mish nga gjeli i detit.

Meqenëse gjelin e detit zakonisht vetëm e pjekim dhe nuk e ziejmë më parë, lëngun e pulës është mirë ta përgatisim duke zier një pulë të vogël fshati, mishin e së cilës e ruajmë në ngrirje për ta përgatitur disa ditë më vonë.

Marrë nga libri “Receta për njerëzit që dua”

Lexo edhe: Gjel deti i mbushur