Qoftë në bashkëbisedimet virtuale apo në jetën e përditshme, jo rallë na ndodh të kemi të bëjmë me “luftë” mes femrave. Bëhet fjalë për biseda tejet të tensionuara edhe kur nuk është aspak e nevojshme. Kjo shpesh ndodh edhe në bashkëbisedimet e ndjekësve të faqes Pernenat, ku shpesh na takon të lexojmë komente aspak të hijshme e madje edhe fyese në drejtim të tjetrës. Sigurisht që nga ana e stafit tonë merren masa të menjëhershme dhe komenti fshihet, por pas një komenti negativ na ndodh të pyesim veten përse është shkruar? Sepse nëse diçka nuk na pëlqen mund ta kalojmë duke qënë se nuk na prek neve personalisht.
Por kjo gjë nuk vihet re vetëm në një faqe që ndiqet online nga shumë përdorues, kjo gjë ndodh shpesh edhe në jetën e përditshme. Na ndodh të shikojmë gra dhe vajza që shprehen në mënyrë tepër të ashpër kundrejt tjetrës. Duke dashur të kuptojmë përse realisht ndodh kjo gjë, e kemi trajtuar si temë edhe në “Koha të bisedojmë” ditën e enjte dhe nënat kanë shprehur mendimet e tyre.

Përse ndodh kjo?

• Mendoj se bëhet fjalë për mospërputhje idesh, duke qënë se shumica prej nesh kanë eksperienca të ndryshme me mjeke të ndryshëm apo marrin këshilla të ndryshme nga familjarët. Shpesh nënat shprehen në varësi të asaj që kanë përjetuar dhe kanë dëgjuar. Por mendoj se edhe xhelozia është një nga faktorët kryesorë.
• Mendoj se femra ka natyrë perfeksioniste, është e egër kur mbron territorin e saj, është egoiste për njerëzit e dashur, është zonjë shtëpie, është profesioniste në atë që bën, është e vetëdijshme se natyra i ka falur armë të fuqishme, mendon shumë në teori dhe kur vjen puna tek krahasimi i ideve me një femër tjetër nuk humb shansin të tregojë superioritetin, talentin, informacionin, shkollimin, “kthetrat” për të treguar se realisht ato japin maksimumin dhe zemrën e tyre në çdo gjë që bëjnë pavarësisht rezultatit.
• Mendoj se kjo ndodh pasi ka shumë femra që mendojnë se duke ulur figurën e një femre tjetër do të duken më inteligjente dhe më të mira, por mendoj se kjo është një mënyrë e gabuar e të vepruarit.

Të jetë vërtet kështu?

Pra ka vërtet femra që mendojnë se duke luftuar ashpër idetë e një tjetre do të bëjnë një figurë më të mirë? Ajo që personalisht mendoj se e bën një femër të flasë dhe trajtojë keq një tjetër nuk ka lidhje realisht me personin që ajo ka përballë, ka lidhje me atë që ajo ndien brenda vetes në lidhje me ato që ka dhe bën në jetë. Sa kënaqësi arrin të marrë nga gjërat që posedon, nga gjërat që mendon se do të arrijë, nga familja që ka, e madje edhe nga financat që ka në dispozicion.
Duke qënë se nga natyra (ashtu si e ka shprehur edhe një nga nënat në koment) femra është me karakter perfeksionist, shpesh një dështim apo zhgënjim nuk e kalon dot lehtë dhe shpesh i kundërvihet një tjetër femre që ka përballë. Nuk duhet të lë pa përmendur dhe një rol shumë të rëndësishëm i jap  shoqërisë maskiliste ku kemi jetuar për një kohë të gjatë dhe që ende duket se jeton mes nesh. Duke thënë këtë, rrjedhimisht duhet të mendojmë sa shumë gjykohen, përbuzen, tallen, shahen, dhunohen idetë dhe puna e femrave në shoqërinë tonë. Nuk mund të presim të marrim vlerësim nga një femër që nuk është vlerësuar asnjëherë dhe që gjithmonë është nënshtruar apo jo?
Është si ajo këshilla që japim shpesh në lidhje me fëmijët, pra vlerësoje punën e tij që të krijojë vetëbesim. Pra mungesa e vetëbesimit do të reflektohet në të gjitha aspektet e jetës. Duke qënë kështu, mendoj se ka një kompleksitet faktorësh që ndikon në agresivitetin e femrave ndaj njëra-tjetrës, por që personalisht faktorin kryesor e cilësoj nënvlerësimin që femra ka marrë për një kohë të caktuar nga shoqëria dhe familja. Në varësi të kësaj do të përcaktohet edhe shkalla e ashpërsisë që gruaja tregon.

')}