Shumë e përdorur dikur për mungesë të mundësive të tjera, ndërsa sot për nostalgji e preferencë, buka e misrit është ndër gatimet tipike shqiptare.

E pëlqyer jo vetëm nga vendasit, por edhe nga turistët e huaj që vizitojnë Shqipërinë, buka e misrit është një nga pasuritë më të mëdha të kulinarisë shqiptare.

Receta e bukës së misrit, sipas traditës së vjetër shqiptare

Përbërësit:

1 kg miell misri
700 ml ujë i ngrohtë (jo i nxehtë)
1 lugë gjellë kripë

pak vaj ulliri

Përgatitja:

Hedhim miellin e misrit në një enë, ku shtojmë edhe vajin e ullirit. Pastaj shtojmë ujin dalëngadalë dhe kripën, duke përzier me një lugë druri, dalëngadalë, derisa të na krijohet një masë e njëtrajtshme. Duhet të keni parasysh se uji nuk duhet të jetë shumë i nxehtë, preferohet aq sa ta durojë dora.

Lyejmë një tepsi me vaj ulliri, ku hedhim masën e përgatitur të brumit.

E lëmë në furrë për 40 minuta në temperaturë 200 gradë.